လူမှုမီဒီယာ YouTube တွင် ထင်ရှားကျော်ကြားသည့် အမေရိကန် YouTuber ဂျိတ်ပေါလ်နှင့် UFC ဝယ်လ်တာဝိတ်တန်း ချန်ပီယံဟောင်း အမေရိကန် MMA ကစားသမား တိုင်ရွန်ဝုဒ်လေတို့ ပရော်ဖက်ရှင်နယ် လက်ဝှေ့ပွဲ ယှဉ်ပြိုင်ထိုးသတ်ရာ ဂျိတ်ပေါလ်က အမှတ်ဖြင့် အနိုင်ရခဲ့ကြောင်း သိရသည်။
ယင်းပွဲစဉ်ကို မြန်မာစံတော်ချိန် တနင်္လာနေ့ နံနက်ပိုင်းက အမေရိကန်ပြည်ထောင်စု အိုဟိုင်းယိုးပြည်နယ် ကလိဗ်လန်းမြို့ရှိ Rocket Mortgage FieldHouse (NBA ကလပ် ကလိဗ်လန်းအသင်း၏အိမ်ကွင်း) ၌ ကျင်းပခဲ့ပြီး ဂျိတ်ပေါလ်အတွက် လေးပွဲမြောက်နှင့် တိုင်ရွန်ဝုဒ်လေအတွက် ပထမဆုံးလက်ဝှေ့ပွဲစဉ် ထိုးသတ်ခြင်းဖြစ်သည်။
ရှစ်ချီပြိုင်ပွဲအဖြစ် ကျင်းပခြင်းဖြစ်ပြီး ပွဲစသည်နှင့် ဂျိတ်ပေါလ်က လျင်မြန်သည့် လက်သီးတွဲလုံးများ ဖြင့် ထိုးသတ်ခဲ့သည်။
တတိယအချီအထိ ဂျိတ်ပေါလ်က လက်ရည်အသာဖြင့် ထိုးသတ်နိုင်ခဲ့ပြီး စတုတ္ထအချီတွင်မူ ဝုဒ်လေ၏ယာလက်သီးချက်ကြောင့် ဂျိတ်ပေါလ် ကြိုးတန်းပေါ် လဲကျသွားခဲ့သည်။
သို့သော် ဂျိတ်ပေါလ်အနေဖြင့် လက်ကျန်အချီများတွင် တည်ငြိမ်စွာ တုံ့ပြန်နိုင်ခဲ့ပြီး ရှစ်ချီပြီးဆုံးချိန်အထိ အရှုံးအနိုင်မပေါ်သဖြင့် ဒိုင်များ၏အဆုံးအဖြတ် ခံယူခဲ့ရသည်။
အမှတ်ဖြင့် ဆုံးဖြတ်ရာတွင် ဒိုင်နှစ်ဦးက ဂျိတ်ပေါလ်ကို ၇၇-၇၅၊ ၇၈-၇၄ ဖြင့် အနိုင်ပေးပြီး ကျန်တစ်ဦးက ဝုဒ်လေကို ၇၇-၇၅ ဖြင့် အနိုင်ပေးခဲ့ခြင်းဖြစ်သည်။
YouTube တွင် Subcriber အရေအတွက် သန်း ၂၀ ကျော်ရှိသူ ဂျိတ်ပေါလ် (၂၄ နှစ်)သည် ပရော်ဖက်ရှင်နယ်လက်ဝှေ့ ပွဲစဉ် လေးပွဲထိုးသတ်ရာတွင် လေးပွဲစလုံး အနိုင်ရထားပြီး ပထမဆုံးသုံးပွဲကို အလဲထိုးနှင့် ယခုပွဲကို အမှတ်ဖြင့် အနိုင်ရခဲ့သည်။
UFC ဝယ်လ်တာဝိတ်တန်းချန်ပီယံဟောင်း ဝုဒ်လေ (၃၉ နှစ်) မှာမူ MMA ပြိုင်ပွဲများ၌ ၂၇ ပွဲထိုးသတ်ရာ ၁၉ ပွဲနိုင်၊ တစ်ပွဲသရေ၊ ခုနစ်ပွဲရှုံးနိမ့်ထားပြီး ပထမဆုံးလက်ဝှေ့ပွဲတွင် ရှုံးပွဲကြုံတွေ့ခဲ့ခြင်းဖြစ်သည်။
၎င်းတို့နှစ်ဦးသည် မကျေပွဲပြန်လည်ထိုးသတ်ရန် သဘောတူထားသော်လည်း ရှုံးနိမ့်သူက တက်တူးရေးထိုးရမည်ဟု ကတိပြုထားကြောင်း သိရသည်။
သို့ဖြစ်ရာ ဝုဒ်လေက ”I Love Jake Paul”ဟု တက်တူးရေးထိုးပြီးမှသာ မကျေပွဲပြန်လည်ထိုးသတ်မည်ဖြစ်သည်။
ယခုပွဲအတွက် ရရှိမည့်ထိုးကြေးကို တရားဝင်ထုတ်ပြန်ခြင်းမရှိသော်လည်း ဂျိတ်ပေါလ်က အနည်းဆုံး ဒေါ်လာတစ်သန်းနှင့် ဝုဒ်လေက ထက်ဝက်ခန့် ရရှိမည်ဖြစ်ကြောင်း သိရသည်။
ထို့ပြင် ၎င်းတို့အနေဖြင့် ရုပ်သံမှ တစ်ပွဲချင်းအခပေး ရောင်းချမှု Pay-per-view ဝင်ငွေလည်း ထပ်မံရရှိမည်ဖြစ်သည်။
ဂျိတ်ပေါလ်သည် ယခုပွဲအပြီးတွင် Love Island ရုပ်သံအစီအစဉ်ဖြင့် ထင်ရှားကျော်ကြားသည့် ဗြိတိန်လက်ဝှေ့သမား တွမ်မီဖျူရီနှင့် ထိုးသတ်ဖွယ်ရှိပြီး တွမ်မီမှာ WBC ဟဲဗီးဝိတ်တန်းချန်ပီယံ တိုင်ဆန်ဖျူရီနှင့် ညီအစ်ကိုတော်စပ်သူဖြစ်သည်။
