မန်ချက်စတာ ယူနိုက်တက် အသင်းရဲ့ ဂိုးနည်းပြ ဖြစ်သူ ရစ်ချက် ဟားတစ်က အရံ ဂိုးသမား ဖြစ်သူ ဆာဂျီယို ရိုမဲရိုးကို ဂိုးသမားဟောင်း တစ်ဦး ဖြစ်သူ အက်ဒ်ဝင် ဗန်ဒါဆား နဲ့ ခိုင်းနှိုင်း ချီးကျူး သွားခဲ့လိုက် ပါတယ် ။ ဟားတစ် ဆိုတာ ပြီးခဲ့တဲ့ ဘောလုံး ရာသီ တုန်းက ဆိုးလ်ရှား ရဲ့ နည်းပြ အဖွဲ့ဝင် အဖြစ် ပူးပေါင်း ခဲ့သူ တစ်ဦးပဲ ဖြစ်ပါတယ် ။
ဆာဂျီယို ရိုမဲရိုးဟာ မန်ချက်စတာ ယူနိုက်တက် အသင်း အတွက် အခြား ဖလားပွဲ တွေသာ ကစားခွင့် ရရှိ နေသူ ဖြစ်ပြီး အမှတ်ပေး ဖလား ပြိုင်ပွဲ တွေမှာတော့ ဒီဂီယာ ရဲ့နောက် နံပါတ် နှစ် အဖြစ် နဲ့သာ အချိန် ငါးနှစ် အထိ ရပ်တည် နေခဲ့ ရသူပဲ ဖြစ်ပါတယ် ။ သူဟာ ယူနိုက်တက် တို့ LASK အသင်းနဲ့ ကစား ခဲ့တဲ့ ယူရို ပါလိဂ် ပြိုင်ပွဲမှာ ပွဲထွက် ကစားခွင့် ရရှိ ထားခဲ့ ပါတယ် ။
လက်ရှိ အချိန် မှာတော့ ရိုမဲရိုးဟာ ဒီဂီယာကို ကျော်ဖြတ်ပြီး အသင်း ရဲ့ လက်ကျန် ယူရို ပါလိဂ် ပွဲစဉ် တွေမှာ ပွဲထွက် ကစားခွင့် တွေကို ပိုင်ဆိုင် နိုင်ဖို့ မျှော်မှန်း နေသူပဲ ဖြစ်ပါတယ် ။ အခုတော့ ဟာတစ်က ဂိုးသမားကောင်း တွေနဲ့ အလုပ်လုပ်ရတဲ့ အတွေ့အကြုံ ကို မျှဝေရင်း ရိုမဲရိုး ရဲ့ စွမ်းဆောင်ရည် တွေကို ချီးကျူး စကား ဆိုသွား ခဲ့လိုက် ပါတယ် ။
” သူ (ရိုမဲရိုး) ဟာ အတွေ့အကြုံ ရင့်ကျက်တဲ့ ဂိုးသမား တစ်ဦး ဖြစ်တယ် ဆိုတာ သိသာ ထင်ရှားလှ ပါတယ် ။ သူဟာ ကမ္ဘာ့ ဖလား ပြိုင်ပွဲ ရဲ့ ဖိုင်နယ် အဆင့် မှာတောင် ပါဝင် ယှဉ်ပြိုင်ခဲ့ ဖူးတဲ့ တစ်ကယ့် လက်ရွေးစင် ဂိုးသမားကောင်း တစ်ဦး ပါပဲ ။ သူဟာ အလုပ်တွေ အရမ်း ကြိုးစားတယ် ဆိုတာကို ကျွန်တော် တွေ့ရှိ ခဲ့ရ ပါတယ် ”
” သူဟာ စိတ်ပိုင်း ဆိုင်ရာ အကြမ်းခံ နိုင်စွမ်း ရှိတဲ့ ဂိုးသမား တစ်ဦး ပါပဲ ။ သူဟာ နေ့စဉ်နေ့တိုင်း ပိုကောင်း လာဖို့ အတွက်ပဲ ကြိုးစား နေသူ တစ်ဦးပါ ။ အခု အသက် 33 နှစ် ရှိနေတာတောင် သူဟာ ကောင်းသထက် ကောင်းဖို့ အခြေခံ သဘောတရားတွေကို ကြိုးစား လေ့ကျင့် နေဆဲ ပါပဲ ။ သူဟာ အမြဲ လန်းဆန်း တက်ကြွ နေတတ် ပါတယ် ”
” ကစားသမားကောင်း တွေက ညှိနှိုင်း ထိန်းချုပ် နိုင်စွမ်း ရှိတတ်ကြ ပါတယ် ။ ဘောလုံး ကစားသမား တွေ ဆိုတာ အသက် အရွယ် ကြီးလာ လေလေ လှုပ်ရှားမှုတွေ နှေးကွေး လေလေ ၊ ဦးနှောက် သွေးကြော ခုန်နှုန်း မြန်ဆန်လာလေ ပါပဲ ။ ဆာဂျီယိုဟာ အဲ့တာ တွေနဲ့ အံဝင် နိုင်ဖို့ အတွက် ကြိုးစား လေ့ကျင့် နေခဲ့သူ တစ်ဦး ပါပဲ ”
” သူဟာ ဗဟုသုတ ရှာဖွေဖို့ ဆာလောင် နေတတ်သူ တစ်ဦးပါ ။ သူဟာ လေ့ကျင့်ရေး အစီအစဉ် ပြီးဆုံးတိုင်း ၊ ပွဲစဉ် တစ်ပွဲ ကစား ပြီးတိုင် video clips လေးတွေ ပြန်ကြည့်ဖြစ် ပါတယ် ။ အဲ့တာ တွေကို ကြည့်ရှု လေ့လာပြီး သူဟာ ပိုပြီး တိုးတက် ကောင်းမွန်အောင် ဘယ်လို လုပ်ရမလဲ ဆိုတာကို ချင့်ချိန် နေတတ်သူ တစ်ဦးပဲ ဖြစ်ပါတယ် ”
” အဲ့ဒီလို ကြိုးစားမှု ၊ အကဲဖြတ်မှု တွေကပဲ သူ့ကို တည်ငြိမ်တဲ့ ဂိုးသမား တစ်ဦး ဖြစ်နေ စေတာ ပါပဲ ။ သူက တစ်ကယ့် ပရော်ဖက်ရှင်နယ် ကစားသမား တစ်ယောက်ပါ ။ သူက အရာရာ တိုင်းကို အလေးအနက်ထား လုပ်ဆောင်သူ တစ်ဦး ပါပဲ ။ ကျွန်တော် အသင်းကို ရောက်လာ ကတည်းက သူဟာ လေ့ကျင့်ရေး အစီအစဉ် ကို တစ်ကြိမ်ပဲ ပျက်ကွက် ထားပါ သေးတယ် ”
” အခြား အချိန်တွေ မှာတော့ သူဟာ မြက်ခင်းပြင်ပေါ် သွားရောက်ပြီး နေ့စဉ်နေ့တိုင်း ညွှန်ကြားထားတာ တွေကို ကြိုးစားလုပ်ဆောင်လေ့ ရှိနေတတ် ပါတယ် ။ ကျွန်တော် အလုပ် လုပ်ခဲ့တဲ့ နာမည်ကျော် ဂိုးသမား တွေနဲ့ သူ့ရဲ့ စိတ်ဓါတ်က အတော်လေး ဆင်တူလှ ပါတယ် ။ သူဟာ ဗန်ဒါဆားလို ပါပဲ ။ ဆာဂျီယို ဟာ ထိပ်တန်း ဘောလုံး အသင်းမှာ အံဝင် နိုင်မယ့် ဂိုးသမား တစ်ယောက်ပါ ”
” ဂိုးသမား ဆိုတာက ဘောလုံး မရရှိတဲ့ အချိန်တွေ မှာတောင် အသင်း အပေါ် အကျိုး သက်ရောက်မှု လုပ်ဆောင် နိုင်ဖို့ လိုအပ် ပါတယ် ။ အခြား သူတွေ မလုပ်ဆောင် နိုင်တဲ့ အသင်းလိုက် ကစားပုံ တွေမှာ သူတို့ ပါဝင် နိုင်ဖို့ ၊ အခြားသူတွေ မဖမ်းယူ နိုင်တဲ့ ဘောလုံး တွေကို ဖမ်းယူ နိုင်ဖို့ လိုအပ် ပါတယ် ။ ဒီမှာ ရှိတဲ့ ဂိုးသမား တွေက အဲ့တာတွေ လုပ်ဆောင်ရ ပါတယ် ”
” နည်းစနစ်ပိုင်း အရ ကြည့်လိုက်မယ် ဆိုရင် ဆာဂျိယိုဟာ အရမ်းကောင်း ပါတယ် ။ သူဟာ ဆုံးဖြတ်ချက် အမြန် လုပ်ဆောင်မှု တွေနဲ့ အတူ အသင်းရဲ့ ကစားပုံ တွေကို ပြောင်းလဲ စေဖို့ ကူညီပေးနိုင် ပါတယ် ။ ဒေးဗစ် ကလည်း အဲ့တာ တွေကို လုပ်လေ့ ရှိပါတယ် ။ အတွေ့အကြုံ ရင့်ကျက်တဲ့ ဂိုးသမား တိုင်းက ဒါကို လုပ်နိုင် ကြတယ်လေ ” လို့ ဟားတစ် က ထုတ်ဖော် ပြောကြား သွားခဲ့လိုက် ပါတယ် ။
