ဘိုင်ယန်မြူးနစ်အသင်း၏ ပိုလန်တိုက်စစ်မှူး လီဝန်ဒေါစကီးသည် စိန်ခေါ်မှုအသစ်များကို ရင်ဆိုင်ရန်အတွက် အသင်းမှ ထွက်ခွာလိုသည်ဟု အသိပေးခဲ့ကြောင်း သတင်းများထွက်ပေါ်လာခဲ့သည်။
လီဝန်ဒေါစကီးသည် ယခုရက်ပိုင်းအတွင်း အသက် (၃၃)နှစ်ပြည့်တော့မည်ဖြစ်ပြီး (၇)နှစ်ကြာ လက်တွဲခဲ့သည့် ဘိုင်ယန်မြူးနစ်အသင်းနှင့် (၁၁)နှစ်ကြာ ကျင်လည်ခဲ့သည့် ဘွန်ဒစ်လီဂါပြိုင်ပွဲကို ကျောခိုင်းရန် ဆန္ဒရှိနေကြောင်း သိရသည်။
လီဝန်ဒေါစကီးသည် ဘိုင်ယန်မြူးနစ်အသင်းတွင် ပျော်ရွှင်နေသော်လည်း အသက်(၃၅)နှစ်မပြည့်မီ အခြားဥရောပထိပ်သီးအသင်းတစ်သင်းသင်းထံ ပြောင်းရွှေ့ကစားရန် လိုလားနေပြီး ပရီးမီးယားလိဂ်ပြိုင်ပွဲ၌ ပါဝင်ကစားခွင့်ရရန် ရည်ရွယ်နေခြင်းဖြစ်ကြောင်းလည်း သိရသည်။
သို့သော် ဘိုင်ယန်မြူးနစ်အသင်းသည် လီဝန်ဒေါစကီးကို ရောင်းထုတ်ရန် ဆန္ဒမရှိသောကြောင့် အနည်းဆုံး ပေါင်သန်း(၁၀၀)ရရှိမှသာ ရောင်းထုတ်မည်ဟု တန်ဖိုးသတ်မှတ်လိုက်ကြောင်း သိရသည်။
ဘိုင်ယန်မြူးနစ်အသင်းသည် လီဝန်ဒေါစကီးကို ၂၀၂၃ ခုနှစ်အထိ စာချုပ်ချုပ်ဆိုထားပြီး စာချုပ်သက်တမ်းတိုးရန် အစီအစဉ်မရှိတော့ဘဲ ယင်းကာလရောက်မှသာ အသင်းမှ ထွက်ခွာခွင့်ပြုရန် ရည်ရွယ်ထားခြင်းဖြစ်ကြောင်းလည်း သိရသည်။
လီဝန်ဒေါစကီးသည် ရီးယဲလ်အသင်း၏ ကာလရှည်ပစ်မှတ်ကစားသမားတစ်ဦးဖြစ်ခဲ့သလို၊ ယခုနွေရာသီအပြောင်းအရွှေ့ကာလအစောပိုင်းတွင် ချယ်လ်ဆီးအသင်းက ခေါ်ယူဖွယ်ရှိကြောင်း သတင်းထွက်ခဲ့သော်လည်း လူကာကူကို ခေါ်ယူနိုင်ခဲ့ပြီဖြစ်သောကြောင့် အဆုံးသတ်သွားခဲ့သည်။
