ရီးယဲလ်မက်ဒရစ်အသင်း၏ ဘယ်လ်ဂျီယံတောင်ပံကစားသမား အီဒင်ဟာဇက်က မိမိအနေဖြင့် ဒဏ်ရာငရဲကာလကို ကျော်ဖြတ်နိုင်ခဲ့ပြီဟု ကြုံးဝါးခဲ့ပြီး ယခုရာသီတွင် အသင်းအတွက် အရာအားလုံးပေးဆပ်သွားမည်ဖြစ်ကြောင်း အလာဗတ်စ်အသင်းအား အဝေးကွင်းတွင် (၄-၁) ဂိုးဖြင့်အနိုင်ရခဲ့သည့် လာလီဂါပွဲစဉ်အပြီးတွင် ပြောကြားခဲ့သည်။
ရီးယဲလ်အသင်း၏ လာလီဂါရာသီသစ်အဖွင့်ပွဲစဉ် ဖြစ်သော အဆိုပါပွဲစဉ်တွင် ဟာဇက်သည် ပွဲထွက်ကစားခွင့်ရရှိခဲ့ပြီး ခြေစွမ်းပြနိုင်ခဲ့သလို၊ ပွဲချိန် (၄၈)မိနစ်တွင် ဘန်ဇီမာသွင်းယူခဲ့သည့် အဖွင့်ဂိုးအား ဖန်တီးပေးနိုင်ခဲ့သည်။
ဟာဇက် (၃ဝနှစ်)သည် ယခုနွေရာသီအပြောင်းအရွှေ့ကာလအတွင်း ရီးယဲလ်မက်ဒရစ်အသင်းမှ ထွက်ခွာရန် နီးစပ်နေပြီဟု သတင်းများအကြိမ်ကြိမ်ထွက်ပေါ်ခဲ့သလို၊ ရီးယဲလ်အသင်းအနေဖြင့်လည်း စံချိန်တင်ပြောင်းရွှေ့ကြေးဖြင့်ခေါ်ယူခဲ့ပြီး ဒဏ်ရာပြဿနာများနှင့်သာ ရုန်းကန်နေရသည့် ဟာဇက်အား ပြန်လည်ရောင်းချရန်စီစဉ်နေပြီဟု စပိန်မီဒီယာများက ဖော်ပြခဲ့ကြသည်။
သို့သော် လက်ရှိအချိန်တွင် ဟာဇက်မှာ ရီးယဲလ်အသင်း၏ လာလီဂါရာသီသစ်အဖွင့်ပွဲစဉ်တွင် ပွဲထွက်ကစားခွင့် ရရှိခဲ့သလို၊ ခြေစွမ်းလည်းပြနိုင်ခဲ့သည့်အတွက် ရီးယဲလ်တွင် အနာဂတ်ဆက်ရှိရန် အခွင့်အရေးကောင်းမွန်လျက်ရှိနေသည်။
ထို့ပြင် ရီးယဲလ်မက်ဒရစ်နည်းပြ အန်ဆယ်လော့တီအနေဖြင့်လည်း အသင်း၏တိုက်စစ်ပိုင်းတွင် ဟာဇက်နှင့် ဘန်ဇီမာတို့ကို လူငယ်ကစားသမားများဖြစ်သည့် ဗင်နီစီယပ်စ်၊ ရိုဒရီဂိုတို့နှင့် တွဲဖက်ကစားစေရန်ဆန္ဒရှိနေရာ ဟာဇက်၏ မက်ဒရစ်လမ်းခွဲသတင်းများမှာ ပြန်လည်တိတ်ဆိတ်သွားဖွယ်ရှိသည်။
ဟာဇက်သည် ၂၀၁၉ နွေရာသီအပြောင်းအရွှေ့က ချယ်လ်ဆီးအသင်းမှ ရီးယဲလ်မက်ဒရစ်အသင်းသို့ အသင်း၏စံချိန်တင်ပြောင်းရွှေ့ကြေး ယူရိုသန်း (၁၀၀)ဖြင့် ရောက်ရှိလာသူဖြစ်ပြီး အသင်းသို့စရောက်ကတည်းက အဝလွန်မှုပြဿနာ၊ ဒဏ်ရာပြဿနာများနှင့် ရင်ဆိုင်ခဲ့ရသူဖြစ်သည်။
ဟာဇက်အနေဖြင့် ပွဲကစားခွင့်ရသည့်အခါတွင်လည်း ခြေစွမ်းပြရန်ရုန်းကန်ခဲ့ပြီး ၎င်းကိုယ်တိုင် သူ၏ဒဏ်ရာအခြေအနေအား စိတ်ပျက်ကြောင်း ဖွင့်ဟခဲ့ဖူးသည်။
ဟာဇက်သည် ပြီးခဲ့သည့် (၂)ရာသီအတွင်း ရီးယဲလ်အသင်းအတွက်ပြိုင်ပွဲစုံ (၄၃)ပွဲသာကစားခွင့်ရခဲ့ပြီး (၅)ဂိုးသာသွင်းယူနိုင်ခဲ့သည်။
ဟာဇက်က ”ကျွန်တော့်မှာ ဘာမှမရှိပါဘူး။ ဒါပေမဲ့ ကျွန်တော်ကိုယ်တိုင်နဲ့ အသင်းအတွက်တော့ ကောင်းမွန်တဲ့ ခံစားမှုတွေရှိပါတယ်။ ခြေချင်းဝတ်ဒဏ်ရာပြဿနာကို ကျွန်တော့်ခေါင်းထဲကထုတ်ဖို့ အသင့်ဖြစ်နေပြီး၊ ဒီရာသီမှာ အသင်းအတွက် အရာအားလုံးပေးဆပ်သွားချင်ပါတယ်။ ကျွန်တော့်အနေနဲ့ ဒဏ်ရာငရဲကာလတွေကနေ ကျော်ဖြတ်နိုင်ခဲ့ပါပြီ။ ကျွန်တော်တို့အသင်းအနေနဲ့ အကောင်းဆုံးကစားပြီး (၄)ဂိုးသွင်းယူနိုင်ခဲ့သလို၊ လာမယ့် ပွဲစဉ်များစွာမှာလည်း အနိုင်ရလဒ်တွေရရှိဖို့ ကြိုးစားသွားပါမယ်” ဟု အလာဗတ်စ်အသင်းအား အနိုင်ရသည့်ပွဲပြီးသတင်းစာရှင်းလင်းပွဲတွင် ပြောကြားခဲ့သည်။
