ဂျူဗင်တပ်စ်နောက်ခံလူ ဘိုနူချီက PSG အသင်းသို့ မက်ဆီ ပြောင်းရွှေ့ခဲ့ခြင်းက အသင်းဖော် စီရော်နယ်လ်ဒို၏ အနာဂတ်အပေါ် သက်ရောက်မှုမရှိကြောင်း ပြောကြားခဲ့သည်။
အသက် (၃၆)နှစ်အရွယ်ရှိ Ballon d’Or (၅)ကြိမ်ပိုင်ရှင် စီရော်နယ်လ်ဒိုသည် ပြီးခဲ့သည့် ၂၀၂၀-၂၁ ရာသီတွင် ခြေစွမ်းပြနိုင်ခဲ့သော်လည်း ဂျူဗင်တပ်စ်အသင်းအနေဖြင့် စီးရီးအေချန်ပီယံ ဆုကို လက်လွှတ်ခဲ့ရသလို၊ ချန်ပီယံလိဂ်ပြိုင်ပွဲတွင်လည်း ရှုံးထွက် (၁၆)သင်းမှ ထွက်ခွာခဲ့ရသဖြင့် ဝေဖန်မှုများနှင့် ရင်ဆိုင်ခဲ့ရသည်။
ထို့ကြောင့် ယခု နွေရာသီအပြောင်းအရွှေ့ကာလ အစောပိုင်းတွင် စီရော်နယ်လ်ဒို၏ အပြောင်းအရွှေ့သတင်းများမှာ လှုပ်ခတ်ခဲ့ပြီး PSG အသင်းသို့ ပြောင်းရွှေ့တော့မည်ဟု သတင်းများထွက်ပေါ်ခဲ့သည်။ သို့သော် ယခုအခါ PSG အသင်းအနေဖြင့် ဘာစီလိုနာအသင်းနှင့်လမ်းခွဲခဲ့သည့် Ballon d’Or (၆)ကြိမ် ပိုင်ရှင် အာဂျင်တီးနားတိုက်စစ်မှူး မက်ဆီ (၃၄ နှစ်)ကို ခေါ်ယူခဲ့သဖြင့် PSG အသင်းနှင့် စီရော်နယ်လ်ဒိုတို့၏ အပြောင်းအရွှေ့သတင်းများမှာ အဆုံးသတ်သွားခဲ့ပြီဖြစ်သည်။
စီရော်နယ်လ်ဒိုသည် ဂျူဗင်တပ်စ်အသင်း နှင့် ၂၀၂၂ ခုနှစ်တွင် စာချုပ်သက်တမ်းကုန်ဆုံးမည်ဖြစ်ပြီး ၎င်းအနေဖြင့် အသင်းမှထွက်ခွာရန် မစဉ်းစားခဲ့ကြောင်း ဘိုနူချီက ပြောကြားခဲ့ခြင်းဖြစ်သည်။ ဘိုနူချီက “တကယ်လို့ PSG အသင်းကို မက်ဆီ မပြောင်းရွှေ့ဖြစ်ခဲ့ဘူးဆိုရင်တောင် စီရော် နယ်လ်ဒိုအနေနဲ့ ဂျူဗင်တပ်စ်အသင်းမှာပဲ ဆက်ရှိနေမယ်လို့ ကျွန်တော် ထင်ပါတယ်။ ကျွန်တော်တို့အတွက် သူ ရှိနေတာက အသင်းရဲ့တန်ဖိုး မြင့်တက်စေပြီး သူ့အနေနဲ့ အရင်ရာသီတွေထက် လာမယ့်ရာသီမှာ အသင်းကို ပိုကူညီနိုင်ပါလိမ့်မယ်” ဟု ဆိုခဲ့သည်။ စီရော်နယ်လ်ဒိုသည် ပြီးခဲ့သည့်ရာသီ က ပြိုင်ပွဲစုံ (၄၄)ပွဲတွင် (၃၆)ဂိုးသွင်းယူခဲ့သည်။
