မက်ဆီအပေါ် ဘာစီလိုနာအသင်း၏ ဆုံးဖြတ်ချက်ကို အဂွဲရိုး စိတ်ပျက်နေပြီး စာချုပ်သက်တမ်း နှစ်လသာရှိသေးသော်လည်း ဖျက်သိမ်းရန် နည်းလမ်းရှာနေ

ဘာစီလိုနာအသင်းတွင် ဆယ်စုနှစ် နှစ်ခုကျော်ကြာနေထိုင်လာသည့် မက်ဆီအား ထွက်ခွာခွင့်ပြုခဲ့ သည့် ဆုံးဖြတ်ချက်ကို တိုက်စစ်မှူးသစ် အဂွဲရိုးက စိတ်ပျက်နေပြီး စာချုပ်သက်တမ်း နှစ်လသာရှိသေးသော်လည်း ပြန်လည်ဖျက်သိမ်းရန်အတွက် နည်းလမ်းရှာဖွေနေကြောင်း သိရသည်။

အဂွဲရိုး (၃၃ နှစ်) သည် မန်စီးတီးအသင်းနှင့် စာချုပ်ကုန်ဆုံးပြီးနောက် ဘာစီလိုနာအသင်းသို့ အလွတ်ပြောင်းရွှေ့လာခြင်းဖြစ်ပြီး နှစ်နှစ်စာချုပ်နှင့် စာချုပ်လျော်ကြေး ယူရိုသန်း ၁၀၀ တန်ဖိုးရှိသည့်အချက် ထည့်သွင်းချုပ်ဆိုထားသည်။

အဂွဲရိုး က ဘာစီလိုနာအသင်းတွင် အာဂျင်တီးနားအသင်းဖော် မက်ဆီနှင့် တွဲဖက်ကစားလိုကြောင်း ထုတ်ဖော်ပြောကြားထားပြီး ယခုအခြေအနေ အရ မဖြစ်နိုင်တော့သဖြင့် ဒေါသ ထွက်နေခြင်းဖြစ်သည်။

ဘာစီလိုနာအခြေစိုက် La Porteria ရုပ်သံအစီအစဉ်၏ ဖော်ပြမှုအရ အဂွဲရိုးသည် ဘာစီလိုနာအသင်းနှင့် ချုပ်ဆိုထားသည့်စာချုပ်ကို ပြန်လည်ဖျက်သိမ်း နိုင်မည့် နည်းလမ်းရှာဖွေရန် ၎င်း၏ ရှေ့နေများကို အသိပေးထားကြောင်း သိရသည်။

ဘာစီလိုနာအသင်းကမူ မနေ့က အဂွဲရိုး လေ့ကျင့်နေသည့် ဗီဒီယိုဖိုင်ကို လူမှုကွန်ရက်တွင်တင်၍ ယင်းသတင်းများအား ပြန်လည် ချေဖျက်ခဲ့သည်။