မန်စီးတီးကွင်းလယ်ကစားသမားသစ် ဂရီးလစ်ရှ်က ဆုဖလားများ ရယူလိုသောကြောင့် မန်စီးတီးအသင်းသို့ ပြောင်းရွှေ့ခဲ့ခြင်းဖြစ်ကြောင်း ပြောကြားခဲ့သည်။
မန်စီးတီးအသင်းသည် အသက်(၂၅)နှစ်အရွယ်ရှိ အင်္ဂလန်ကွင်းလယ်ကစားသမား ဂရီးလစ်ရှ်ကို ဗြိတိန်စံချိန်တင်ပြောင်းရွှေ့ကြေး ပေါင်သန်း(၁၀၀)ဖြင့် ခေါ်ယူကာ (၆)နှစ်စာချုပ်ချုပ် ဆိုခဲ့သည်။
ဂရီးလစ်ရှ်သည် မန်စီးတီးအသင်းတွင် တစ်ပတ်လစာ ပေါင် (၂၀၀၀၀၀)ကျော် ရရှိမည်ဖြစ်ကြောင်း ဗြိတိန်မီဒီယာများက ဖော်ပြခဲ့ကြသည်။
မန်စီးတီးအသင်းသို့ ရောက်ရှိလာခြင်းအပေါ် ဂရီးလစ်ရှ်က “ကျွန်တော် လပေါ် ရောက်သွားသလိုပါပဲ။ မန်စီးတီးလို အသင်းအတွက် ကစားရမှာက ကျွန်တော့်အတွက် အလွန်ကြီးကျယ်ခမ်းနားပါတယ်။ ကျွန်တော့်ဘဝတစ်လျှောက်လုံး ဗီလာပရိသတ်ဖြစ်ခဲ့တာကြောင့် ဆုံးဖြတ်ရတာ ခက်ခဲပါတယ်။ ဒါပေမဲ့ အဓိကအကြောင်းပြချက်ကတော့ ဆုဖလားအောင်ပွဲတွေအတွက်ပါပဲ။ ပြီးတော့ ကမ္ဘာ့အကောင်းဆုံး နည်းပြတစ်ယောက်ရဲ့လက်အောက်မှာ ကစားချင်တာလည်း ပါပါတယ်။ ဒီလိုအခွင့်အရေးကို ကျွန်တော် မငြင်းနိုင်ပါဘူး”ဟု ပြောကြားခဲ့သည်။
ဂရီးလစ်ရှ်သည် မန်စီးတီးအသင်းတွင် ကျောနံပါတ် (၁၀)ကို ဝတ်ဆင်ကစားမည်ဖြစ်ကြောင်း သိရှိရသည်။
