ဂျူဗင်တပ်စ်အသင်း၏ တိုက်စစ်မှူး စီရော်နယ်လ်ဒိုသည် အသင်းနှင့်အတူ ပြန်လည်လေ့ကျင့်နေပြီဖြစ်သော်လည်း အသင်းပြောင်းရွှေ့ရန် ဆန္ဒရှိနေဆဲဖြစ်ကြောင်း AS အပါအဝင် ဥရောပမီဒီယာအချို့က ဖော်ပြခဲ့ကြသည်။
ဂျူဗင်တပ်စ်အသင်းက စီရော်နယ်လ်ဒို ဆက်ရှိမည်ဟု ပြောကြားထားသော်လည်း ကစားသမားဘက်မှ မည်သို့မျှ မှတ်ချက်ပေးခြင်းမရှိသေးပေ။
စီရော်နယ်လ်ဒိုသည် ဂျူဗင်တပ်စ်အသင်းကို စွန့်ခွာ၍ အပြောင်းအလဲပြုလုပ်ရန် လိုလားနေပြီး ယင်းအတွက် PSG တိုက်စစ်မှူး ဘာပေအပေါ် မူတည်နေကြောင်း AS က သုံးသပ်ခဲ့သည်။
စီရော်နယ်လ်ကို အသင်းဟောင်း ရီးယဲလ်နှင့် PSG အသင်းတို့က ခေါ်ယူရန် စိတ်ဝင်စားနေသလို၊ စီရော်နယ်လ်ဒိုကလည်း ယင်းအသင်းများက ကမ်းလှမ်းလာခဲ့ပါက လက်ခံဖွယ်ရှိနေသည်။
သို့သော် ယင်းအသင်းနှစ်သင်းသည် ဘာပေကို ခေါ်ယူနိုင်ရေး၊ ထိန်းသိမ်းနိုင်ရေးအတွက် အဓိကအားပြိုင်ရမည့် အခြေအနေရှိနေပြီး ဘာပေကို လက်လွှတ်ရသည့်အသင်းကသာ စီရော်နယ်လ်ဒိုကို ခေါ်ယူရန် ကြိုးပမ်းလိမ့်မည်ဖြစ်ကြောင်း သိရသည်။
စီရော်နယ်လ်ဒိုသည် ရီးယဲလ်အသင်းကို အန်ဆယ်လော့တီ တစ်ကျော့ပြန် ကိုင်တွယ်နေသောကြောင့် ရီးယဲလ်အသင်းသို့ ပြန်လည်ပြောင်းရွှေ့ရန် ပိုမိုလိုလားနေကြောင်းလည်း သိရသည်။
စီရော်နယ်လ်ဒိုက အန်ဆယ်လော့တီသည် ၎င်း၏ ကစားသမားဘဝ၌ အကောင်းဆုံးနှင့် အရေးအပါဆုံးနည်းပြများထဲမှတစ်ဦးဖြစ်ကြောင်း ပြောကြားခဲ့ဖူးသည်။
သို့သော် ရီးယဲလ်အသင်းကမူ ဘာပေအား ခေါ်ယူနိုင်ရေးကိုသာ အဓိကပစ်မှတ်ထားနေကြောင်း သိရသည်။
