ယခုနွေရာသီတွင် ခေါ်ယူထားသည့် ကြယ်ပွင့်ကစားသမားနှစ်ဦးက အပြောင်းအလဲကြီးကြီးမားမား ဖြစ်စေလိမ့်မည်ဟု မန်ယူအသင်းနည်းပြ ဆိုးလ်ရှားက သုံးသပ်ပြောကြားခဲ့သည်။
မန်ယူအသင်းသည် ဒေါ့မွန်အသင်း၏ အင်္ဂလန်လက်ရွေးစင်တောင်ပံကစားသမား ဆန်ချို (၂၁ နှစ်) ကို အပြီးသတ်ခေါ်ယူထားပြီးဖြစ်သလို ရီးယဲလ်မက်ဒရစ်အသင်း၏ ပြင်သစ်နောက်ခံလူ ဗာရန်း(၂၈ နှစ်) ကိုလည်း ခေါ်ယူရန် သဘောတူညီမှုရရှိထားပြီး ဆေးစစ်မှုပြုလုပ်ရန်နှင့် အပြီးသတ် စာချုပ်လက်မှတ်ရေးထိုးရန်သာ ကျန်ရှိတော့သည်။
သို့ဖြစ်ရာ ဆိုးလ်ရှားက ယခုနွေရာသီအပြောင်းအရွှေ့ကာလတွင် ကစားသမားသစ်များကို စောစီးစွာခေါ်ယူနိုင်ခြင်းမှာ အလွန်ကောင်းကြောင်းနှင့် ကစားသမားသစ်နှစ်ဦးကို အသင်းကို ပြောင်းလဲစေမည်ဖြစ်ကြောင်း ပြောကြားခဲ့ခြင်းဖြစ်သည်။
ဆိုးလ်ရှားက “ကျွန်တော် အရင်က ပြောဖူးသလိုပါပဲ။ အပြောင်းအရွှေ့တွေကို စောစောလုပ်နိုင်ရင် မန်နေဂျာတိုင်း ပျော်ရွှင်ကြလိမ့်မယ်ဆိုတာပါ။ ဒီနှစ်မှာတော့ အဲဒီလိုမျိုး ကျွန်တော်တို့ လုပ်နိုင်ခဲ့ပါပြီ။ ဒီကစားသမားနှစ်ယောက်က ကျွန်တော်တို့အတွက် ကြီးမားတဲ့အပြောင်းအလဲတွေ ဖြစ်စေမှာပါ။ သူတို့နှစ်ယောက်က ဒီရာသီအတွက် ရေတိုပြင်ဆင်မှုဖြစ်သလို ရေရှည်အတွက်လည်း ရည်ရွယ်ထားတာပါ။ ရာဖေးလ် (ဗာရန်း)က ခံစစ်အတွင်းလူနေရာအတွက် အကောင်းဆုံး အသက်အရွယ်ရောက်နေတဲ့သူပါ။ သူက ဟာရီ(မက်ဂွိုင်းရား) နဲ့ အသက်အတူတူပါပဲ။ အဲရစ်(ဘာယီ)ထက် တစ်နှစ်နဲ့ ဗစ်တာ(လင်ဒီလော့ဖ်)ထက် နှစ်နှစ်ပဲ ကြီးပါတယ်။ ကျွန်တော့်ဆီမှာ ဒီလိုစိတ်လှုပ်ရှားစရာ ခံစစ်အစုအဖွဲ့ ပိုင်ဆိုင်ထားပါပြီ။ ဂျေဒန်(ဆန်ချို)ကလည်း ကစားသမားကောင်းဖြစ်လို့ လူငယ်တိုက်စစ်အစုအဖွဲ့ကလည်း စိတ်လှုပ်ရှားစရာ ကောင်းပါတယ်။ ဒီကစားသမားနှစ်ယောက်ကို အစောကြီးရလိုက်တဲ့အတွက် ကျွန်တော့်ကို ဒီထက်ပိုပြီး အာမခံချက်ပေးဖို့ တောင်းဆိုနေစရာ မလိုတော့ပါဘူး”ဟု ဗုဒ္ဓဟူးနေ့က ဘရန့်ဖို့ဒ်အသင်းနှင့်ကစားသည့် ခြေစမ်းပွဲ အပြီးတွင် ပြောကြားခဲ့သည်။
မန်ယူအသင်းသည် ၂၀၂၀-၂၁ ရာသီ ပရီးမီးယားလိဂ်အဖွင့်ပွဲစဉ်အဖြစ် သြဂုတ်လ (၁၄)ရက်တွင် လိဒ်စ်အသင်းကို အိမ်ကွင်း၌ လက်ခံကစားရမည်ဖြစ်သည်။
