ဘာစီလိုနာအသင်းတိုက်စစ်ပိုင်းတွင် မက်ဆီ၊ အဂွဲရိုးတို့နှင့် သဟဇာတဖြစ်ပြီး တွဲကစားနိုင်မည်ဟုယုံကြည်ကြောင်း ဒတ်ချ်တိုက်စစ်ကစားသမား ဒီပိုင်းက ထုတ်ဖော် ပြောကြားခဲ့သည်။
အသက် (၂၇)နှစ်အရွယ်ရှိ နယ်သာလန်လက်ရွေးစင်တိုက်စစ်ကစားသမား ဒီပိုင်းသည် ယခုနွေရာသီအပြောင်းအရွှေ့ကာလတွင် လိုင်ယွန်အသင်းမှ ဘာစီလိုနာအသင်းသို့ ပြောင်းရွှေ့ကြေးအလွတ်ဖြင့် ရောက်ရှိလာသူဖြစ်သည်။
”မက်ဆီနဲ့ အတူတွဲကစားရတာဟာ အံ့ အားသင့်စရာကောင်းပါတယ်။ ဒါက ဖြစ်နိုင်မယ်လို့လည်း မျှော်လင့်ပါတယ်။ အသင်းအတွက်လိုအပ်တဲ့ အရည်အသွေးအတော်များများ သူ့မှာရှိပြီး ဒါကိုဝန်းရံကာ အရာရာတိုင်းကို တည်ဆောက်နိုင်ဖို့ အရေးကြီးပါတယ်။ အသင်းမှာ အရည်အချင်းရှိသူ အမြောက်အမြားရှိပါတယ်။ သူနဲ့အတူတွဲကစားပြီး ဆုဖလားတွေရယူနိုင်ရင်တော့ ကျွန်တော့်အတွက် ကြီးကျယ်ခမ်းနားမှုတစ်ခုပါပဲ”ဟု ဒီပိုင်းက ပြောကြားခဲ့သည်။
ဒီပိုင်းက နည်းပြ ကိုးမန်းသည် သူ့အပေါ်လွှမ်းမိုးမှုရှိသည့် နည်းပြဟုလည်း မှတ်ချက်ပြုခဲ့သည်။
ထို့ပြင် ဒီပိုင်းက အသင်းသစ်တွင် အားလုံးက ၎င်းကို နွေးထွေးစွာကြိုဆိုခဲ့ကြကြောင်း ပြောကြားခဲ့သည်။
ဒီပိုင်းက ”လူတိုင်းက ကျွန်တော့်အပေါ် ကြင်နာကြပါတယ်။ အဝတ်လဲခန်းမှာ အသင်းဖော်တွေရဲ့နွေးထွေးတဲ့ ကြိုဆိုမှုကို ရရှိခဲ့ပြီး အဲဒီအတွက် အရမ်းကိုသက်သောင့်သက်သာဖြစ်ရပါတယ်”ဟု ပြောကြားခဲ့သည်။
