ဥရောပဘောလုံးအဖွဲ့ချုပ်(UEFA) သည် ယူရိုပြိုင်ပွဲကို ပြိုင်ပွဲဝင်အသင်းအရေအတွက် ထပ်မံတိုးမြှင့်ရန် စဉ်းစားနေပြီး ယူရို-၂၀၂၈ ပြိုင်ပွဲမှစ၍ (၃၂)သင်းပါဝင်သည့်ပြိုင်ပွဲအဖြစ် ပြောင်းလဲဖွယ်ရှိနေကြောင်း သိရသည်။
UEFA သည် ယူရိုပြိုင်ပွဲကို (၂၄)သင်းအထိ တိုးမြှင့်ခဲ့သည်မှာ ပြိုင်ပွဲနှစ်ခုသာ ရှိသေးသော်လည်း ကမ္ဘာ့ဖလားနှင့်အပြိုင် အသင်းအရေအတွက်အများအပြားပါဝင်သည့် ပြိုင်ပွဲအဖြစ် တိုးမြှင့်ဖန်တီးလိုခြင်းဖြစ်ကြောင်း သိရသည်။
ထို့ပြင် ယူရို-၂၀၁၆ နှင့် ယူရို-၂၀၂၀ ပြိုင်ပွဲများကို အသင်း(၂၄)သင်းဖြင့် အောင်မြင်စွာ ကျင်းပနိုင်ခဲ့ပြီးနောက် (၃၂)သင်းသို့ တိုးမြှင့်ရန် လွယ်ကူလိမ့်မည်ဟု ယူဆထားကြောင်းလည်း သိရသည်။
UEFA သည် (၃၂)သင်းပြိုင်ပွဲအဖြစ် တိုးမြှင့်ရန်အတွက် လေ့လာသုံးသပ်မှုများ စတင်ပြုလုပ်နေပြီဖြစ်ပြီး ယူရို-၂၀၂၈ ပြိုင်ပွဲအတွက် အိမ်ရှင်နိုင်ငံရွေးချယ်မည့် ၂၀၂၃ ခုနှစ်တွင် အတည်ပြုနိုင်ဖွယ်ရှိကြောင်း သိရသည်။
UEFA သည် ဂျာမနီနိုင်ငံတွင် ကျင်းပမည့် ယူရို-၂၀၂၄ ပြိုင်ပွဲအထိ လက်ရှိပုံစံအတိုင်း အသင်း (၂၄)သင်းပါဝင်သည့်ပြိုင်ပွဲအဖြစ်သာ ဆက်လက်ကျင်းပသွားရန် စီစဉ်ထားပြီး (၃၂)သင်းသို့ တိုးမြှင့်ရန် အတည်ပြုနိုင်ခဲ့ပါက ယူရို-၂၀၂၈ ပြိုင်ပွဲတွင် စတင်အကောင်အထည်ဖော်ဖွယ်ရှိကြောင်းလည်း သိရသည်။
UEFA ၏ လက်အောက်တွင် အဖွဲ့ဝင် နိုင်ငံ (၅၅)နိုင်ငံသာရှိသောကြောင့် လက်ရှိ(၂၄) သင်းတိုးမြှင့်မှုကိုပင် ဝေဖန်သူအချို့ရှိခဲ့သော်လည်း UEFA ကမူ ထိပ်သီးအသင်းများ အုပ်စုအဆင့်တွင် ထိပ်တိုက်မတိုးခြင်းဖြင့် ရှုံးထွက်အဆင့်များ၌ ပိုမိုအကြိတ်အနယ်ဖြစ်လိမ့်မည်ဟု ယူဆနေသည်။
ထို့ပြင် ကမ္ဘာ့ဖလားပြိုင်ပွဲကို ၂၀၂၆ ကမ္ဘာ့ဖလားမှစ၍ ပြိုင်ပွဲဝင်အသင်း (၄၈)သင်းသို့ တိုးမြှင့်မည်ဖြစ်သောကြောင့် ယူရိုပြိုင်ပွဲကို အပြိုင်လိုက်လံတိုးချဲ့ရန် စဉ်းစားနေခြင်းဖြစ်ကြောင်း သိရသည်။
