ယူရို-၂၀၂၀ ပြိုင်ပွဲ၏ အကောင်းဆုံးကစားသမားဆုကို ပြိုင်ပွဲသက်တမ်းတစ်လျှောက် ဂိုးသမားများထဲမှ ပထမဆုံးအဖြစ် အီတလီဂိုးသမား ဒွန်နာရမ်မာက ရရှိခဲ့ကြောင်း သိရသည်။
အသက်(၂၂)နှစ်အရွယ်သာရှိသေးသူ ဒွန်နာရမ်မာသည် ယခုယူရိုပြိုင်ပွဲတွင် Clean Sheet (၃)ပွဲရရှိခဲ့ပြီး ဂိုးပေါက်ကာကွယ်မှုမှာလည်း (၉)ကြိမ်ရှိခဲ့ကာ ဆီမီးဖိုင်နယ်နှင့် ဗိုလ်လုပွဲပယ်နယ်တီအဆုံးအဖြတ်များတွင် အသင်း၏သူရဲကောင်းဖြစ်ခဲ့သည်။
ဒွန်နာရမ်မာအနေဖြင့် တူရကီ၊ ဆွစ်ဇာလန်၊ ဝေးလ်စ်အသင်းများနှင့်ကစားခဲ့သည့် (၃)ပွဲစလုံးတွင် Clean Sheet ရရှိခဲ့ပြီး (၁၆)သင်းအဆင့်မှ ဗိုလ်လုပွဲအထိ (၄)ပွဲတွင်သာ တစ်ဂိုးစီပေးခဲ့ရသည်။
ထို့ပြင် သူ၏ကစားသမားဘဝ၌ ပယ်နယ်တီအဆုံးအဖြတ်ကန်ရမှု(၅)ကြိမ်တွင် (၅)ကြိမ်စလုံး အနိုင်ရခဲ့ပြီး ကလပ်အသင်းဖြစ်သည့် အေစီမီလန်နှင့် (၃)ကြိမ်၊ အီတလီအသင်းနှင့် (၂)ကြိမ် ရရှိခဲ့သည်။
၎င်းသည် အသက်(၁၇)နှစ်ပြည့်မွေးနေ့တွင် အေစီမီလန်အသင်းနှင့် ပွဲထွက်ခွင့်ရခဲ့ပြီး အေစီမီလန်အသင်းအတွက် ပွဲပေါင်း (၂၁၅)ပွဲအထိ ကစားပေးခဲ့ကာ နိုင်ငံအသင်း တွင်မူ (၃၃)ပွဲ ရှိလာခဲ့သည်။
ဒွန်နာရမ်မာသည် လက်ရှိတွင် အေစီမီလန်အသင်းနှင့် စာချုပ်သက်တမ်းကုန်ဆုံးထားပြီး ပြင်သစ်လီဂူးကလပ် PSG အသင်းသို့ ပြောင်းရွှေ့ရန်သေချာသလောက်ရှိနေကာ ယူရိုပြိုင်ပွဲကို စောင့်ဆိုင်းနေသောကြောင့် ကြန့်ကြာနေခြင်းဖြစ်သည်။
PSG အသင်းသည် ဒွန်နာရမ်မာကို (၅) နှစ်စာချုပ် ချုပ်ဆိုသွားမည်ဖြစ်ပြီး တစ်နှစ်လစာငွေ ယူရို(၁၂)သန်းနှင့် အပိုဆုကြေးများလည်း ပေးချေ မည်ဖြစ်ကြောင်း သိရသည်။
