ယူရို ၂၀၂၀ ၊ ၁၆ သင်း ရှုံးထွက် အဆင့်မှာ အင်္ဂလန် အသင်း ကို ၂-၀ နဲ့ ရှုံးနိမ့် ခဲ့ပြီးနောက် ဂျာမနီ နည်းပြ ရာထူးကနေ အနားယူသွားတဲ့ ဂျိုအာဂျင်လို ဟာ အိုဇေးလ် နဲ့ ကာလရှည်ကြာ စကားမပြောမှုကို အဆုံးသတ်ချင်ပြီ ဖြစ်ကြောင်း ဖွင့်ဟ ပြောကြား လိုက်ပါတယ် ။
ဂျိုအာဂျင်လို ဟာ ၂၀၀၉ ခုနှစ်တုန်းက အိုဇေးလ် ကို ဂျာမနီ လက်ရွေးစင် အသင်းကြီးမှာ ပထမဆုံး အကြိမ် ပွဲထွက် ကစားခွင့် ပေးခဲ့သူဖြစ်ပါတယ် ။ အိုဇေးလ် ဟာ ဂျာမနီ အတွက် ပွဲပေါင်း ၉၂ ပွဲ ကစား ပေးခဲ့ပြီး ၂၀၁၄ ခုနှစ်တုန်းက ကမ္ဘာ့ဖလား ရရှိရာမှာ အဓိက ကျခဲ့တဲ့ ကစားသမား တစ်ဦးပါ ။ ဒါပေမယ့် ၂၀၁၈ ခုနှစ် ကမ္ဘာ့ဖလားအပြီးမှာတော့ အိုဇေးလ် ဟာ နိုင်ငံ အသင်းကနေ အနားယူ သွားခဲ့ပါတယ် ။
၂၀၁၈ ခုနှစ် ကမ္ဘာ့ဖလား မတိုင်ခင်တုန်းက အိုဇေးလ် နဲ့ ဂန်ဒိုဂန် တို့ဟာ တူရကီ သမ္မတ နဲ့ သွားရောက် တွေ့ဆုံပြီး ဓါတ်ပုံ ရိုက်ခဲ့တာကြောင့် ဝေဖန်မှု တွေ ခံခဲ့ရပါတယ် ။ တူရကီ နဲ့ ဂျာမနီ ဟာ နိုင်ငံရေး အရ တင်းမာမှု တွေ ရှိခဲ့တာ ဖြစ်ပြီး အိုဇေးလ် ကို ၂၀၁၈ ကမ္ဘာ့ဖလား မှာ မရွေးချယ်ဖို့ အထိ တောင်းဆိုမှု တွေ ရှိခဲ့ပါတယ် ။
အဲ့ဒီ ၂၀၁၈ ကမ္ဘာဖလားမှာ ဂျာမနီ အသင်းဟာ အုပ်စု အဆင့်ကနေပဲ လှည့်ပြန် ခဲ့ရပြီး အိုဇေးလ် ဟာလည်း လူမျိုးရေး ခွဲခြားမှု တွေနဲ့ ရင်ဆိုင် ခဲ့ရသလို သစ္စာဖောက် အဖြစ်လည်း သမုတ် ခံခဲ့ရပါတယ် ။ အိုဇေးလ် ကို အဓိက လူမျိုးရေး ခွဲခြား ၊ မလေးမစား ပြုမှု ခဲ့တာဟာ ဂျာမနီ ဘောလုံး အဖွဲ့ချုပ်က တာဝန် ရှိသူတွေ ကိုယ်တိုင် ဖြစ်နေခဲ့တာပါ ။
ဒါကြောင့် အိုဇေးလ် ဟာ ၂၀၁၈ ကမ္ဘာ့ဖလား အပြီးမှာ လက်ရွေးစင် အသင်းကနေ အနားယူပြီ ဖြစ်ကြောင်း တရားဝင် ကြေညာ ခဲ့ခြင်း ဖြစ်ပါတယ် ။ အဲ့ဒီ အချိန်ကတည်းက အိုဇေးလ် နဲ့ ဂျိုအာဂျင် တို့ဟာ စကားပြောဆို ဆက်ဆံမှု မရှိတော့တာ ဖြစ်ပါတယ် ။
ယူရို ၂၀၂၀ ကနေ ထွက်ခွာခဲ့ရပြီးနောက် ဂျာမနီ နည်းပြ ရာထူးကနေ အနားယူသွားခဲ့တဲ့ ဂျိုအာဂျင်လို က ” အကြီးမားဆုံး စိတ်ပျက်ခဲ့ရတာကတော့ မီဆွတ် တစ်ယောက် ကျနော့်ကို မတိုင်ပင်ပဲ လက်ရွေးစင် အသင်းကနေ အနားယူ သွားခဲ့တာပါပဲ ။ “
” ဒါပေမယ့် ကျွန်တော်တို့ နှစ်ယောက် ပြန်ဆုံဖြစ်တဲ့ အချိန် စကားပြန်ပြောဖြစ်တဲ့ အချိန် ရောက်လာလိမ့်ဦးမယ်လို့ ထင်ပါတယ် ။ တစ်နေ့မှာ ဖြစ်ခဲ့တဲ့ အရာတွေ အားလုံးကို ဘေးဖယ်ထားပြီး သူ နဲ့ စကားပြန်ပြောဖြစ်တဲ့ အချိန်ကို ရောက်လာမှာပါ ။ “
” ရှိခဲ့တဲ့ အမှတ်တရတွေက ကျွန်တော်တို့ နှစ်ဦးစလုံးအတွက် အပေါင်း လက္ခဏာ ဆောင်တဲ့ အရာတွေပါပဲ ၊ သူက အသင်းအတွက် သိပ်အရေးပါတဲ့ ကစားသမား ဖြစ်ခဲ့ပြီး အံ့ဖွယ် အရည်အချင်းကို ပိုင်ဆိုင်တဲ့ ထိပ်တန်း ကစားသမား တစ်ယောက်ပါ ။ ” လို့ ပြောကြား သွားခဲ့ပါတယ် ။
ပြီးခဲ့တဲ့ နှစ်တုန်းက ဂျာမနီ ဘောလုံးအဖွဲ့ချုပ်ဟာ အိုဇေးလ် ကိစ္စကို ကိုင်တွယ်ရာမှာ သူတို့ အမှားအယွင်းတွေ လုပ်ခဲ့မိကြောင်း ဝန်ခံ ခဲ့ပါတယ် ။ ” အိုဇေးလ် ရဲ့ ကိစ္စ နဲ့ ပတ်သက်ပြီး ကိုင်တွယ်ရာမှာ DFB အနေနဲ့ အမှားတွေ လုပ်ခဲ့မိပါတယ် ။ “
” ဓါတ်ပုံလေး တစ်ပုံက သတင်း ခေါင်းစဉ်ကြီးတွေမှာ နေရာယူ ခဲ့ပြီး အကြီးအကျယ် ပြဿနာ တက်ခဲ့ပါတယ် ။ အဲ့ဒီ အချိန်တုန်းက လူမျိုးရေး ခွဲခြား ပြောဆို ဆက်ဆံမှုတွေလည်း ရှိခဲ့ပါတယ် ၊ ကစားသမား နဲ့ တွေ့ဆုံဖို့ ကျနော်တို့ဘက် ပျက်ကွဲ ခဲ့ပါတယ် ။ ” လို့ ဂျာမန် အက်ဖ်အေ အထွေထွေ အတွင်းရေးမှူး က ပြောကြား ခဲ့တာပါ ။
အိုဇေးလ် ဟာ ဂျာမနီ အသင်းအတွက် စုစုပေါင်း ၉၂ ပွဲ ကစားကာ ၂၃ ဂိုး သွင်းယူ နိုင်ခဲ့ပြီး ဂိုးဖန်တီးမှု ၄၀ ပြုလုပ် နိုင်ခဲ့ပါတယ် ။ ဒါ့အပြင် ဂျာမနီ အကောင်းဆုံး ကစားသမား ဆု ကိုလည်း ငါးကြိမ် တိုင်တိုင် ရရှိထား သူဖြစ်ပါတယ် ။
