ဥရောပစူပါလိဂ်ကျင်းပဖြစ်ပါက ဥက္ကဋ္ဌအဖြစ် တာဝန်ယူဆောင် ရွက်မည့် ရီးယဲလ်မက်ဒရစ်အသင်း ဥက္ကဋ္ဌ ဖလော်ရင်တီနိုပီရက်ဇ်က စူပါလိဂ်အစီအစဉ် ဆက်ရှိနေဆဲ ဖြစ်ပြီး စာချုပ်အရ မည်သူမျှနုတ် ထွက်၍မရကြောင်း ထုတ်ဖော်ပြော ကြားသည်။
ချန်ပီယံလိဂ်ပြိုင်ပွဲမှခွဲထွက်၍ အသင်း ၂၀ ဖြင့် ကျင်းပမည့် ဥရောပ စူပါလိဂ်အစီအစဉ်ကို ထိပ်သီးကလပ် ၁၂ သင်းက ဧပြီလတတိယပတ်အတွင်း ထုတ်ပြန်ကြေညာခဲ့သော်လည်း ပရိသတ်များအပါအဝင် နယ်ပယ်အသီးသီးမှ ပြင်းထန်သည့် ဝေဖန်ကန့်ကွက်မှုများကြောင့် မန်ယူ၊ မန်စီးတီး၊ ချယ်လ်ဆီး၊ လီဗာပူးလ်၊ အာဆင်နယ်၊ စပါးစသည့် ပရီးမီး ယားလိဂ် Big Six ခြောက်သင်း၊ အက်သလက်တီကို၊ အင်တာမီလန် နှင့် အေစီမီလန်အသင်းတို့က ပြန်လည်နုတ်ထွက်ကြောင်း ကြေညာခဲ့သည်။
စူပါလိဂ်အစီအစဉ်ထုတ်ပြန်ကြေညာသည့် ၁၂ သင်းအနက် ရီး ယဲလ်မက်ဒရစ်၊ ဘာစီလိုနာနှင့် ဂျူဗင်တပ်စ်တို့သုံးသင်းသာ နုတ်ထွက်ရန် ကျန်ရှိတော့ပြီး ဥရောပဘောလုံး အဖွဲ့ချုပ် (UEFA) က ၎င်းတို့အား အရေးယူရန် စုံစမ်းစစ်ဆေးမှုများ ပြုလုပ်နေသော်လည်း မက်ဒရစ်မြို့ရှိ တရားရုံးက EU (ဥရောပသမဂ္ဂ) ၏ ယှဉ်ပြိုင်မှုဆိုင်ရာ စည်းမျဉ်းအရ အရေးယူခြင်းမပြုရန် ကနဦးအမိန့် ချမှတ်ထားသဖြင့် ဆိုင်းငံ့ထားရသည်။
ယင်းအခြေအနေနှင့်ပတ်သက်၍ စပိန်အခြေစိုက် El Transistor ရေဒီယိုအစီအစဉ်တွင် ဖလော်ရင်တီနိုပီရက်ဇ်က “ကျွန်တော်တို့ ဘက်ကတော့ အေးအေးဆေးဆေးပါပဲ။ ဘာဖြစ်လို့လဲဆိုတော့ ကျွန်တော်တို့ အနိုင်ရပြီမို့ပါ။ အင်္ဂလိပ် အသင်းတွေက အတင်းအကျပ်စေခိုင်းခံရတာပါ။ သူတို့က လက်မှတ်မထိုးသင့်တဲ့ဟာကို လက်မှတ်ထိုးခဲ့ပါတယ်။ ဘာဖြစ်လို့လဲဆိုတော့ သူတို့က စူပါလိဂ်မှာပါဝင်ဖို့ ကတိပြုထားလို့ပါ။ တာဝန်ရှိသူတွေက သူတို့ကို အပြစ်ပေးချင်ပေမဲ့ တရားရုံးက ခွင့်မပြုပါဘူး။ ဘယ်သူမှနုတ်ထွက်လို့မရတဲ့ စာချုပ်ကို ကျွန်တော်တို့ ချုပ်ဆိုထားတာပါ။ စူပါလိဂ်က ရှေ့ ဆက်နေတုန်းပါပဲ။ ဆုံးဖြတ်လို့ရတဲ့ တရားသူကြီးဆီကို ကျွန်တော်တို့ သွားတဲ့အခါ စူပါလိဂ်က ထိလို့မရဘူးလို့ သူက ပြောပါတယ်။ UEFA အနေနဲ့ လူတွေကိုရော ကလပ်တွေကိုပါ ဘာမှလုပ်လို့မရပါဘူး။ အရေးယူမယ့်ဟာက ရပ်တန့်သွားပါပြီ။ အခုအချိန်မှာ လူဇင်ဘတ်မှာရှိတဲ့ တရားရုံးက ဆုံးဖြတ်ရမှာပါ” ဟု ပြောကြားခဲ့သည်။
စူပါလိဂ်မှနုတ်ထွက်ရန် ကျန်ရှိ သည့် သုံးသင်းအနေဖြင့် ချန်ပီယံလိဂ်အပါအဝင် ဥရောပပြိုင်ပွဲယှဉ် ပြိုင်ခွင့် နှစ်ရာသီပိတ်ပင်ခံရနိုင် ကြောင်း ခန့်မှန်းသတင်းများစွာ ထွက်ပေါ်ခဲ့သော်လည်း မက်ဒရစ်တရားရုံး၏ ဆုံးဖြတ်မှုအရ ၎င်းတို့ သုံးသင်းစလုံး လာမည့်ရာသီ ချန်ပီယံလိဂ်ပြိုင်ပွဲတွင် ဝင်ရောက်ယှဉ်ပြိုင်ခွင့်ရမည်ဖြစ်သည်။ ထို့ပြင် ပီရက်ဇ်က ရာသီကုန်တွင် လမ်းခွဲခဲ့သည့် ဇီဒန်း၊ ရာမို့စ်တို့၏အကြောင်း နှင့် ဘေးလ်၊ ဗာရန်းတို့၏ အနာဂတ်အပြင် ဘာပေကိုခေါ်ယူမည့် အခြေအနေကိုလည်း ရှင်းလင်းပြောကြားခဲ့သည်။
“ဇီဒန်းရဲ့နုတ်ထွက်စာကို ကျွန် တော်မဖတ်ဖြစ်ပါဘူး။ တော်တော်ဆိုးတယ်လို့တော့ ပြောကြတယ်။ အဲဒါက သူရေးတာမဟုတ်ပါဘူး။ တစ်စုံတစ်ယောက်က သူ့အတွက် ရေးပေးတာဖြစ်ပါလိမ့်မယ်။ ဆာဂျီယိုကို ကျွန်တော်ချစ်ပါတယ်။ ကျွန်တော်တို့ သူ့ကို စာချုပ်တစ်ခု ကမ်းလှမ်းခဲ့ပါတယ်။ အဲဒါက အချိန်အတိုင်းအတာရှိတယ်လို့လည်း ပြောခဲ့ပါတယ်။ ဗာရန်း ယူရိုကနေ ပြန်လာမယ့်အချိန်ကို စောင့်ကြတာပေါ့။ သူက စာချုပ်တစ်နှစ်ကျန်ပါသေးတယ်။ သူနဲ့ စကားမပြောရသေးသလို ကမ်းလှမ်းမှုတွေလည်း မရသေးပါဘူး။ မက်ဒရစ်အနေနဲ့ အကောင်းဆုံးတွေကိုပဲ အမြဲတမ်း လုပ်နေပေမဲ့ ကိုယ့်ကစားသမား မဟုတ်တဲ့သူအကြောင်း မပြောချင် ပါဘူး” ဟု ၎င်းက ဆိုသည်။
