ပေါ်တူဂီနောက်ခံလူ ဖွန်တီက မိမိတို့၏အသင်းခေါင်းဆောင် စီရော်နယ်လ်ဒိုအနေဖြင့် အကောင်းဆုံးပုံစံရှိနေဆဲဖြစ်ကြောင်း ပြိုင်ဘက်အသင်းများကို သတိပေးခဲ့သည်။
စီရော်နယ်လ်ဒို (၃၆ နှစ်)သည် ပြီးခဲ့သည့် ၂၀၂၀-၂၁ ရာသီက ဂျူဗင်တပ်စ်အသင်း၏ စီးရီးအေနှင့် ချန်ပီယံလိဂ်ပြိုင်ပွဲများတွင် ကျဆုံးမှုများအတွက် ဝေဖန်မှုများ ရင်ဆိုင်ခဲ့ရသူဖြစ်သည်။ သို့သော် ဖွန်တီက စီရော်နယ်လ်ဒိုမှာ အကောင်းဆုံးပုံစံရှိနေဆဲဖြစ်ပြီး ၎င်းထံမှ များစွာမျှော်လင့်နိုင်သေးကြောင်း ပြောကြားခဲ့သည်။
ဖွန်တီက “သူ(စီရော်နယ်လ်ဒို)က ကျွန်တော်တို့ရဲ့ ခေါင်းဆောင်ပါ။ သူဟာ အမြဲတမ်းအကောင်းဆုံးပြင်ဆင်လေ့ရှိသူဖြစ်ပြီး ပရော်ဖက်ရှင်နယ်အလွန်ပီသသူဖြစ်ပါတယ်။ သူ ဘယ်လောက်ကောင်းတယ်ဆိုတာ သူ့ရဲ့သွင်းဂိုးစံချိန်တွေက သက်သေပါပဲ။ သူဟာ အကောင်းဆုံးဖြစ်ဖို့ ကြိုးစားနေဆဲဖြစ်သလို၊ အကောင်းဆုံးပုံစံမှာလည်း ရှိနေဆဲပါပဲ” ဟု ပြောကြားခဲ့သည်။
