ဘာစီလိုနာအသင်းသို့ ပြောင်းရွှေ့သွားပြီဖြစ်သည့် အာဂျင်တီးနားတိုက်စစ်မှူး အဂွဲရိုး၏ မန်စီးတီးအသင်းနှင့် နှုတ်ဆက်ပွဲတွင် နည်းပြ ဂွါဒီယိုလာ မျက်ရည်ကျခဲ့ခြင်းမှာ အလိမ်အညာသာဖြစ်ကြောင်း အဂွဲရိုး၏ဖခင်ဖြစ်သူ ကက်စတီလိုက စွပ်စွဲပြောကြားခဲ့သည်။
” ကျွန်တော် သူ့ကို မယုံပါဘူး။ သူဟာ အဂွဲရိုးကို ဘယ်တော့မှ အလိုမရှိခဲ့ဘူးလို့ပဲ ကျွန်တော် ယူဆပါတယ်။ တကယ်တော့ သူဟာ အသင်းတိုင်းမှာ ကစားသမားတွေထက် ပိုပြီးထင်ပေါ်ချင်သူပါ” ဟု ကက်စတီလိုက ပြောကြားခဲ့သည်။
ထို့ပြင် ကက်စတီလိုက မိမိ၏သားဖြစ်သူသည် မန်စီးတီးအသင်းထံမှ စာချုပ်သက်တမ်းတိုးရန် ကမ်းလှမ်းမှုကို နောက်ဆုံးအချိန် စောင့်ဆိုင်းနေခဲ့ကြောင်း ဖွင့်ဟခဲ့သည်။ အဂွဲရိုးသည် ဘာစီလိုနာအသင်း သို့ နှစ်နှစ်စာချုပ်ဖြင့် ပြောင်းရွှေ့ခဲ့ခြင်းဖြစ်သည်။
