ရီးယဲလ်တောင်ပံကစားသမား ဂါရတ်ဘေးလ်က ယူရိုပြိုင်ပွဲအပြီးတွင် မိမိ၏အနာဂတ်နှင့်ပတ်သက်ပြီး အသင်းနည်းပြသစ် အန်ဆယ်လော့တီနှင့်ဆွေးနွေးသွားမည်ဖြစ်ကြောင်း ပြောကြားခဲ့သည်။
အသက် (၃၁)နှစ်အရွယ်ရှိ ဝေးလ်စ်တောင်ပံကစားသမား ဂါရတ်ဘေးလ်သည် ရီးယဲလ်အသင်းတွင် ယခင်နည်းပြဟောင်း ဇီဒန်းနှင့် ဆက်ဆံရေးအဆင်မပြေခြင်းကြောင့် ပြီးခဲ့သည့် ၂၀၂၀-၂၁ ရာသီတွင် စပါးအသင်းသို့ အငှားသွားရောက်ကစားခဲ့ရသည်။
ရီးယဲလ်အသင်းနှင့် ချုပ်ဆိုထားသည့် ဂါရတ်ဘေးလ်၏ စာချုပ်မှာ တစ်နှစ်ကျန်ရှိသေးသော်လည်း ၎င်းအနေဖြင့် ယူရိုပြိုင်ပွဲအပြီးတွင် ကစားသမားဘဝမှ အနားယူဖွယ်ရှိနေသည်ဟု သတင်းများထွက်ပေါ်နေသည်။
သို့သော် ဂါရတ်ဘေးလ်က ရီးယဲလ်နည်းပြသစ် အန်ဆယ်လော့တီအား ချီးကျူးခဲ့ပြီး ယူရိုပြိုင်ပွဲအပြီးတွင် ၎င်း၏အနာဂတ်အတွက် ဆွေးနွေးသွားမည်ဖြစ်ကြောင်း ပြောကြားခဲ့ခြင်းဖြစ်သည်။
ဂါရတ်ဘေးလ်က “အန်ဆယ်လော့တီက ကြီးကျယ်ခမ်းနားတဲ့ နည်းပြတစ်ယောက်ဆိုတာကို ကျွန်တော် သိပါတယ်။ သူနဲ့ ကျွန်တော်အကြားမှာ ကောင်းမွန်တဲ့ ဆက်ဆံရေးရှိသလို၊ ကောင်းမွန်တဲ့အချိန်တွေကိုလည်း အတူဖြတ်သန်းခဲ့ဖူးပါတယ်။ လောလောဆယ်မှာတော့ ယူရိုပြိုင်ပွဲကိုပဲ ကျွန်တော် အာရုံစိုက်ထားပါတယ်။ ယူရိုပြိုင်ပွဲအပြီးမှာတော့ ရီးယဲလ်အသင်းကို ပြန်သွားပြီး အန်ဆယ်လော့တီနဲ့ ဆွေးနွေးသွားမှာပါ။ ခုချိန်မှာတော့ အနာဂတ်အကြောင်းကို ကျွန်တော် မတွေးသေးပါဘူး”ဟု ပြောကြားခဲ့သည်။
အန်ဆယ်လော့တီသည် ရီးယဲလ်အသင်းကို ၂၀၁၃ ခုနှစ်မှ ၂၀၁၅ ခုနှစ်အထိ ပထမအကြိမ် ကိုင်တွယ်စဉ်က ဂါရတ်ဘေးလ်ကို စပါးအသင်းမှ ရီးယဲလ်အသင်းသို့ ခေါ်ယူခဲ့သူဖြစ်သည်။
ဂါရတ်ဘေးလ်သည် အန်ဆယ်လော့တီလက်ထက်တွင် ရီးယဲလ်အသင်း၌ ခြေစွမ်းပြနိုင်ခဲ့ပြီး ၎င်းတို့နှစ်ဦးအကြား ဆက်ဆံရေးကောင်းမွန်ခဲ့ကြောင်း သိရသည်။
