ချဲလ်ဆီး အသင်း ဟာ တမြန်နေ့ည က ကစားခဲ့တဲ့ ချန်ပီယံလိဂ် ဖလား ဗိုလ်လုပွဲမှာ ပရီးမီးယားလိဂ် ချန်ပီယံ မန်စီးတီး အသင်းကို ပထမပိုင်း အတွင်း ရခဲ့တဲ့ ကိုင်ဟာဗက်ဇ်ရဲ့ တလုံးတည်းသော သွင်းဂိုးနဲ့ အတူ အနိုင်ရကာ ၊ ၉နှစ်အကြာ ဒုတိယမြောက် ချန်ပီယံလိဂ် ဖလားကို ဆွတ်ခူးနိုင်ခဲ့ပြီ ဖြစ်ပါတယ် ။
မနှစ်က ပီအက်စ်ဂျီ အသင်း နဲ့ အတူ ဒုတိယ နေရာမှာ ကျေနပ်ခဲ့ရတဲ့ ချဲလ်ဆီး နည်းပြ သောမတ်စ် တူချယ် နဲ့ နောက်ခံလူ သီယာဂို ဆေးလ်ဗား တို့အတွက် ဒီတကြိမ်မှာတော့ ချိုမြိန်တဲ့ ချန်ပီယံလိဂ် ဗိုလ်လုပွဲ ညချမ်း ဖြစ်ခဲ့ပါတယ် ။
တူချယ် ကတော့ ချဲလ်ဆီး အသင်းကို လွန်ခဲ့တဲ့ ၄လခန့်ကမှ ရောက်လာခဲ့တာ ဖြစ်ပေမယ့် ၊ သီယာဂို ဆေးလ်ဗား ကတော့ ယခင် နည်းပြဟောင်း ဖရန့် လမ်းပတ်ရဲ့ ခေါ်ဆောင်မှုနဲ့ ပြီးခဲ့တဲ့ နွေရာသီ ဈေးကွက်မှာ အလွတ် ပြောင်းရွှေ့ကြေးနဲ့ ချဲလ်ဆီးသို့ ရောက်ရှိလာခဲ့ပါတယ် ။
ပီအက်စ်ဂျီ ရဲ့ စွန့်ပစ်ခြင်းကို ခံခဲ့ရတဲ့ ယင်း ဘရာဇီး ဝါရင့် ခံစစ်မှူးဟာ ချဲလ်ဆီး အသင်းမှာမှ ကလပ် ဂန္တဝင် ဖရန့် လမ်းပတ်ရဲ့ ယုံကြည်မှုကို ရရှိခဲ့လို့ ၊ ၎င်းအပေါ် အထူး ကျေးဇူးတင်ခဲ့ပြီး ၊ ချန်ပီယံလိဂ် ဖလား ဆွတ်ခူးအပြီးမှာလည်း အခုလိုပဲ ကျေးဇူးတင်စကား ဆိုခဲ့ပါတယ် ။
ချန်ပီယံလိဂ် ဖိုင်နယ် အပြီး RMC Sport သတင်းဌာန နဲ့ တွေ့ဆုံခဲ့ရာမှာ သီယာဂို ဆေးလ်ဗား က ” လမ်းပတ်ကြောင့်သာ မဟုတ်ရင် ၊ ကျွန်တော် ဒီ အသင်းကိုလည်း ရောက်လာခဲ့ဖို့ အကြောင်း မရှိပါဘူး ။ ဒီတော့ ကျွန်တော် အရမ်း ပျော်ရွှင်နေပါတယ် ။ သူလည်း ဒီအတွက် ကျွန်တော့လိုပဲ ဂုဏ်ယူ ဝမ်းမြောက်နေမယ်လို့ မျှော်လင့်ပါတယ် ။ ”
” ဒါဟာ ကျွန်တော့ ကစားသမား ဘဝရဲ့ အကြီးကျယ်ဆုံး နဲ့ အရေးပါဆုံး အခိုက်အတန့် ဖြစ်ပါတယ် ။ ဒါကြောင့် ကျွန်တော် အမှန်တကယ် ပျော်ရွှင်နေတာပါ ။ ကျွန်တော် တို့ဟာ မနှစ်က ဖိုင်နယ်မှာ ပီအက်စ်ဂျီ နဲ့ အတူ ချန်ပီယံ ဖြစ်အောင် မစွမ်းဆောင်နိုင်ခဲ့ကြပါဘူး ။ ”
” မကြာခင်မှာလည်း ပီအက်စ်ဂျီ လည်း ချန်ပီယံလိဂ် ဖလား မြှောက်နိုင်ဖို့ ကျွန်တော် မျှော်လင့်ပါတယ် ။ ပီအက်စ်ဂျီ အသင်း ချန်ပီယံလိဂ် က ထွက်ခွာရတဲ့ အခါတိုင်း ကျွန်တော့ကြောင့် ဆိုပြီး အပြစ်တင်ခံခဲ့ရတာတွေ ရှိခဲ့ဖူးပါတယ် ။ ဒါက စိတ်မကောင်းစရာပါ ။ ဒီနေ့မှာတော့ ကျွန်တော် ဟာ ချဲလ်ဆီး အတွက် အရာရာ ပေးဆပ်ခဲ့ပါတယ် ။ ” လို့ ပြောကြားခဲ့ပါတယ် ။
အသက် ၃၆နှစ် အရွယ်ရှိ သီယာဂို ဆေးလ်ဗား ဟာ အခုအခါမှာ ကစားသမား ဘဝ တလျှောက် သူ အလိုချင်ဆုံး ချန်ပီယံလိဂ် ဖလားကို ပထမဆုံး အကြိမ် အဖြစ် ဆွတ်ခူးခဲ့ပြီ ဖြစ်ပေမယ့် ၊ လာမယ့် ရာသီမှာလည်း ချဲလ်ဆီး အသင်းနဲ့ပဲ ဆက်လက် ဖြတ်သန်းဖို့ သေချာသလောက် ရှိလာပါပြီ ။
တနှစ် စာချုပ်သာ ချုပ်ထားလို့ ၊ လာမယ့် ဇွန်လ အကုန်မှာ စာချုပ် သက်တမ်း ပြည့်မှာ ဖြစ်ပေမယ့် ၊ ချဲလ်ဆီး အသင်း ဟာ သီယာဂို ဆေးလ်ဗားနဲ့ ဆက်လက် လက်တွဲဖို့ နောက်ထပ် တနှစ် သက်တမ်းတိုးခွင့် ကို လာမယ့် ရက်ပိုင်း အတွင်း အသက်သွင်းဖို့ ရှိနေပါတယ် ။
