မန်ယူအသင်း၏ တိုက်စစ်မှူး မားကပ်စ်ရပ်ရှ်ဖို့ဒ်က သူသည် ဗီလာရီးယဲလ်အသင်းကို ရှုံးနိမ့်ခဲ့သည့် ယူရိုပါလိဂ်ဗိုလ်လုပွဲအပြီးတွင် လူမျိုးရေးခွဲခြားလှောင်ပြောင်သည့် မက်ဆေ့ချ်များစွာကို ရရှိခဲ့သည်ဟု အတည်ပြုပြောကြားခဲ့သည်။
အသက် (၂၃)နှစ်အရွယ် အင်္ဂလန်လက်ရွေးစင်တိုက်စစ်မှူး ရပ်ရှ်ဖို့ဒ်က ၎င်းရရှိခဲ့သည့် မက်ဆေ့ချ်များထဲတွင် သင်္ချာသင်ကြားသည့်ကျောင်းဆရာတစ်ဦး၏ အကောင့်အစစ်ပင် ပါဝင်ခဲ့သည်ဟု ဆိုခဲ့ပြီး “သူက ကလေးတွေကို သင်ကြားပေးနေတဲ့သူပါ။ ဒါပေမဲ့ သူကိုယ်တိုင်ကတော့ လူမျိုးရေးခွဲခြားမှုကို ဘယ်လိုအကျိုးဆက်ကိုမှ မစဉ်းစားဘဲ လုပ်နေတယ်” ဟုလည်း Twitter တွင် ရေးသားထားသည်။
ရပ်ရှ်ဖို့သည် ယင်း Tweet ကို ဂဒန့်စ်မြို့တွင် ရှုံးနိမ့်ခဲ့သည့် ဗိုလ်လုပွဲအပြီး နာရီပိုင်းအကြာတွင်ပင် ရေးသားခဲ့ခြင်းလည်းဖြစ်သည်။
At least 70 racial slurs on my social accounts counted so far. For those working to make me feel any worse than I already do, good luck trying 👍🏾
— Marcus Rashford MBE (@MarcusRashford) May 26, 2021
ယခုကဲ့သို့ ဆိုရှယ်မီဒီယာများပေါ်တွင် တိုက်ခိုက်ခံရခြင်းသည် ရပ်ရှ်ဖို့ဒ်အတွက် ပထမဆုံးအကြိမ်မဟုတ်ဘဲ ပြီးခဲ့သည့် ဇန်နဝါရီလအတွင်းကလည်း ဂရိတ်မန်ချက်စတာရဲတပ်ဖွဲ့သည် လူမျိုးရေးခွဲခြားမှု ကျူးလွန်သူများကို စုံစမ်းဖော်ထုတ်မှုများ ပြုလုပ်ခဲ့ရသေးသည်။
ထိုအချိန်က သူသည် “ဟုတ်တယ်။ ငါက လူမည်းတစ်ဦးဖြစ်ပြီး ငါ့ကိုယ်ငါ ဂုဏ်ယူတဲ့စိတ်နဲ့ နေ့ရက်တိုင်းမှာ ရှင်သန်နေပါတယ်” ဟု တုံ့ပြန်ခဲ့သည်။
လူမှုကွန်ရက်မီဒီယာများသည် လူမျိုးရေးခွဲခြားမှုများ၏ အဓိက အရင်းအမြစ်နေရာတစ်ခုဖြစ်နေပြီး မကြာသေးမီကလည်း ဘောလုံးအသိုင်းအဝိုင်းအတွင်းရှိသူများသည် ဆိုရှယ်မီဒီယာအသုံးပြုခြင်းကို (၄)ရက် ရပ်နားသည့်လှုပ်ရှားမှုဖြင့် ဆန္ဒဖော်ပြခဲ့ကြသေးသည်။
