စီရော်နယ်လ်ဒိုနှင့် အယ်လ်နာဆာအသင်းအကြား ချုပ်ဆိုခဲ့သည့် စာချုပ်တွင် ဆော်ဒီအာရေဗျ၏ ၂၀၃၀ ကမ္ဘာ့ဖလားပြိုင်ပွဲ ပူးတွဲအိမ်ရှင်ဖြစ်ရေး ကြိုးပမ်းမှုလုပ်ငန်းစဉ်များတွင် ထောက်ခံအားပေးရမည့်အချက် ပါဝင်နေသည်ဟု သတင်းများထွက်ပေါ်နေမှုအား အသင်းဘက်မှ ငြင်းဆန်ခဲ့သည်။
အသက် (၃၇)နှစ်အရွယ်ရှိ စီရော်နယ်လ်ဒိုသည် အယ်လ်နာဆာအသင်းနှင့် စာချုပ်အရ အားကစားသမားများထဲတွင် အမြင့်ဆုံးဝင်ငွေအဖြစ် တစ်နှစ် ယူရိုသန်း (၂၀၀)အထိရရှိပြီး စာချုပ်သက်တမ်းမှာ ၂၀၂၅ ခုနှစ် ဇွန်လအထိဖြစ်သည်။
ပြီးခဲ့သည့် ဒီဇင်ဘာလကုန်ပိုင်းက စပိန်သတင်းများတွင် စီရော်နယ်လ်ဒိုသည် ၂၀၃၀ ကမ္ဘာ့ဖလားပြိုင်ပွဲ အိမ်ရှင်ရွေးပွဲအတွက် ဆော်ဒီအာရေဗျ၏သံတမန်ဖြစ်လာသည်ဟု ရေးသားခဲ့ကြသည်။
အယ်လ်နာဆာအသင်းက ယင်းသတင်းများနှင့် ပတ်သက်ပြီး အသင်း Twitter တွင်မဟုတ်မှန်ကြောင်း ကြေညာချက်ထုတ်ပြန်ခဲ့သည်။ ထွက်ပေါ်နေသည့် သတင်းများသည် ကွဲပြားခြားနားနေသည်ကို အယ်လ်နာဆာ FC အနေဖြင့် ရှင်းရှင်းလင်းလင်းသိစေလိုပြီး ခရစ္စတီယာနိုရော်နယ်လ်ဒိုနှင့် အယ်လ်နာဆာအသင်း၏စာချုပ်တွင် ကမ္ဘာ့ဖလားအိမ်ရှင်ရွေးပွဲနှင့် ပတ်သက်သည့် မည်သည့်ကတိမှ မပါဝင်ကြောင်း၊ သူ့အနေဖြင့် အယ်လ်နာဆာအသင်းကို အာရုံစိုက်ရမှာဖြစ်ပြီး ကလပ်အောင်မြင်မှုရရှိစေရေး အကူအညီပေးရန်အတွက် အသင်းဖော်များနှင့်သာ အတူအလုပ်လုပ်ရန် လိုအပ်ကြောင်း ရေးသားထုတ်ပြန်ခဲ့ခြင်းဖြစ်သည်။
ဆော်ဒီအာရေဗျနိုင်ငံသည် ၂၀၃၀ ကမ္ဘာ့ဖလားပြိုင်ပွဲ အိမ်ရှင်ရွေးချယ်ပွဲတွင် အီဂျစ်၊ ဂရိနိုင်ငံများနှင့် ပူးပေါင်းပြီး ပူးတွဲအိမ်ရှင်အဖြစ် ဝင်ရောက်ရွေးချယ်ခံမည်ဖြစ်သည်။
