၂၀၂၂-၂၃ ရာသီ စီးရီးအေတစ်နှစ်တာအကောင်းဆုံးကစားသမားဆု (MVP)အတွက် ဆန်ခါတင် (၃)ဦးစာရင်းများကို ထုတ်ပြန်ခဲ့ရာ အဓိကဆုဖြစ်သည့် တန်ဖိုးအရှိဆုံး ကစားသမားဆုဆန်ခါတင်စာရင်းတွင် အေစီမီလန် တိုက်စစ်မှူး ရာဖေးလ်လီယာအို၊ နာပိုလီတိုက်စစ်မှူးဗစ်တာ အိုဆင်မန်နှင့် အင်တာမီလန်တိုက်စစ်မှူး လော်တာရိုမာတီနက်ဇ်တို့ပါဝင်ခဲ့ကြောင်းသိရသည်။
စီးရီးအေပြိုင်ပွဲ၏ တစ်ရာသီအတွင်း စွမ်းဆောင်ရည်အကောင်းဆုံး ကစားသမားများကို ရွေးချယ်ချီးမြှင့်သည့် MVP ဆုတွင် အဓိကဆုဖြစ်သည့် တန်ဖိုးအရှိဆုံး ကစားသမားဆုအပြင် နေရာအလိုက်အကောင်းဆုံး ကစားသမားဆုများကိုလည်း ချီးမြှင့်မည်ဖြစ်ပြီး ဂိုးသမား၊ နောက်တန်း၊ ကွင်းလယ်နှင့် တိုက်စစ်အကောင်းဆုံး ဆုများအတွက် ဆန်ခါတင် (၃)ဦးစာ ရင်းများကိုလည်းထုတ်ပြန်ခဲ့သည်။
အကောင်းဆုံးဂိုးသမားဆုဆန်ခါတင်စာရင်းတွင် ဂရီဂိုရီယို (မွန်ဇာ)၊ ပရိုဗီဒယ်လ် (လာဇီယို)၊ စကိုရပ်စကီး (ဘိုလော့ဂ်နာ)တို့ပါဝင်ခဲ့ပြီး၊ အကောင်းဆုံးနောက်ခံလူဆုတွင် ဒီလော်ရန်ဇို၊ ကင်မင်ဂျေး (နာပိုလီ)၊ သီယိုဟာနန်ဒက်ဇ် (အေစီမီလန်)၊ အကောင်းဆုံးကွင်းလယ်လူဆုတွင် ဘာရယ်လာ (အင်တာမီလန်)၊ မီလင်ကိုဗစ်ဆာဗစ် (လာဇီယို)၊ ရာဘီယူ (ဂျူဗင်တပ်စ်)နှင့် အကောင်းဆုံးတိုက်စစ်မှူးဆုတွင် တန်ဖိုးအရှိဆုံးကစားသမားဆုဆန်ခါတင်စာရင်း၌ပါဝင်ခဲ့သည့် လီယာအို၊ အိုဆင်မန်နှင့် လော်တာရိုမာတီနက်ဇ် တို့ပြန်လည်ပါဝင်ခဲ့ပြီး အကောင်းဆုံး လူငယ်ကစားသမားဆုတွင် ဘယ်လ်ဒန်ဇီ (အမ်ပိုလီ)၊ ဖာဂီယိုလီ (ဂျူဗင်တပ်စ်)၊ စကယ်လ်ဗီနီ (အတ္တလန်တာ) တို့ပါဝင်ခဲ့ကြောင်းသိရသည်။
ပြီးခဲ့သည့် ၂၀၂၁-၂၂ ရာသီ MVP ဆု၏ တန်ဖိုးအရှိဆုံးကစားသမားဆုကို အေစီမီလန်တိုက်စစ်မှူး လီယာအိုက ရရှိခဲ့ပြီး အကောင်းဆုံးလူငယ်ကစားသမားဆုကို နာပိုလီတိုက် စစ်မှူး အိုဆင်မန်နှင့် အကောင်းဆုံးတိုက်စစ်မှူးဆုကို လာဇီယိုတိုက်စစ်မှူး အီမိုဘီလီတို့က ရရှိခဲ့ကြောင်း သိရှိရသည်။
