တရုတ်နိုင်ငံ၊ ဘေဂျင်းမြို့က အိမ်ရှင်အဖြစ် လက်ခံကျင်းပမည့် ၂၀၂၂ ဆောင်းရာသီ အိုလံပစ်ပြိုင်ပွဲကို သံတမန်ရေးရာအရ သပိတ်မှောက်ကြောင်း အမေရိကန်အစိုးရက အတည်ပြုကြေညာခဲ့သည်။
အိမ်ဖြူတော်အစိုးရက တရုတ်နိုင်ငံ၏ လူ့အခွင့်အရေးမှတ်တမ်းများအပေါ် စိုးရိမ်ပူပန်မိသောကြောင့် အိုလံပစ်ပြိုင်ပွဲသို့ အားကစားအဖွဲ့ တရားဝင်စေလွှတ်သွားမည်မဟုတ်ဟု ပြောကြားခဲ့သည်။ သို့သော် အမေရိကန် အားကစားသမားများအနေဖြင့် ပြိုင်ပွဲတွင် ဝင်ရောက်ယှဉ်ပြိုင်နိုင်ပြီး ပံ့ပိုးကူညီမှုများ ပေးသွားမည်ဟု ကတိပြုခဲ့သည်။
အမေရိကန်သမ္မတဖြစ်သူ ဂျိုးဘိုင်ဒင်က အိုလံပစ်ပြိုင်ပွဲကို သံတမန်နည်းအရ သပိတ်မှောက်ရန် ချိန်ဆနေကြောင်း ပြီးခဲ့သည့်လကတည်းက ပြောကြားထားခြင်းဖြစ်သည်။ ဒီဇင်ဘာလ ၆ ရက်တွင် အိမ်ဖြူတော်၏သတင်းထုတ်ပြန်ရေးဆိုင်ရာ အတွင်းရေးမှူး ဂျန်ပီဆာကီက ပြိုင်ပွဲအပေါ် သပိတ်မှောက်မှုကို အတည်ပြုကြေညာသွားခဲ့သည်။ သို့သော် ယခုကြေညာချက်သည် ပြိုင်ပွဲအတွက် လေ့ကျင့်နေသည့် အားကစားသမားများအပေါ် ထိခိုက်လိမ့်မည်ဟု အမေရိကန်အစိုးရအနေဖြင့် မထင်မြင်မိကြောင်း ပီဆာကီက ဖြည့်စွက်ပြောကြားခဲ့သည်။
အမေရိကန်အစိုးရ၏ကြေညာချက် ထွက်ပေါ်လာပြီးနောက် ၀ါရှင်တန်အခြေစိုက် တရုတ်သံရုံးက အိုလံပစ်စိတ်ဓာတ်ကို ကြီးမားသည့်ပုံဖျက်မှုဟု တုံ့ပြန်ခဲ့သည်။ “ဒီလူတွေ လာမှာ၊ မလာမှာနဲ့ပတ်သက်ပြီး ဘယ်သူတွေမှလည်း ဂရုမစိုက်ပါဘူး။ ၂၀၂၂ ဆောင်းရာသီ အိုလံပစ်ပြိုင်ပွဲကို အောင်မြင်စွာ ကျင်းပနိုင်ရေးမှာ ဒီသပိတ်မှောက်မှုက ဘာမှသက်ရောက်မှု ရှိမှာ မဟုတ်ပါဘူး”ဟု တရုတ်သံရုံး၏ပြောရေးဆိုခွင့်ရှိသူ လျူဖန်းယူက Reuters သတင်း ဌာန၏မေးမြန်းမှုကို ဖြေကြားခဲ့သည်။ အမေရိကန်နိုင်ငံရေးသမားများကို ဘေဂျင်းအိုလံပစ်ပြိုင်ပွဲသို့ ဖိတ်ကြားသွားမည်မဟုတ်ဟုလည်း လျူဖန်းယူက အတည်ပြုခဲ့သည်။
ဒီဇင် ဘာလ ၇ ရက် နံနက်ပိုင်းတွင် အမေရိကန်အ စိုးရက ဘေဂျင်းအိုလံပစ်အပေါ် သံတမန်ရေးရာအရ သပိတ်မှောက်သည့် ကြေညာချက်နှင့် ပတ်သက်သည့် အကြောင်းအရာများကို တရုတ်လူမှုကွန်ရက် Weibo တွင် စိစစ်ဖြတ် တောက်ထားခဲ့ကြောင်း သိရသည်။ အဆိုပါကြေညာချက်အား တရုတ်အစိုးရပိုင်မီဒီယာ ဖြစ်သည့် Global Times က သတင်းရေးသားရာတွင် ယင်း Post အောက်ရှိ Comment အ များစုကို ဖျက်ပစ်ခဲ့သည်။ Comment ပေါင်း ၁၅၀၀ ခန့်ရှိသည့်အနက် ရှစ်ခုလောက်သာ ကြည့်ရှုခွင့်ရခဲ့ကြောင်း သိရသည်။
အိုလံပစ်ပြိုင်ပွဲကို ကမ္ဘာ့နိုင်ငံများမှ အစိုးရကိုယ်စားပြု ထိပ်တန်းအာဏာပိုင်များ တက်ရောက်လေ့ရှိပြီး မကြာသေးမီက ကျင်းပခဲ့သည့် တိုကျိုနွေရာသီအိုလံပစ်ပြိုင်ပွဲ$လည်း သမ္မတ ဂျိုးဘိုင်ဒင်၏ဇနီးဖြစ်သူ ဂျေးဘိုင်ဒင်က အမေရိကန် အားကစားအဖွဲ့ကို ဦးဆောင်တက်ရောက်ခဲ့သည်။ ၂၀၂၂ ဘေဂျင်းအိုလံပစ်ပြိုင်ပွဲကို ဖေဖော်ဝါရီလ ၄ ရက်မှ ၂၂ ရက်အထိ ကျင်းပသွားမည်ဖြစ်သည်။
