၂၀၂၂ ခုနှစ်အတွက် ကမ္ဘာ့ဘောလုံးအဖွဲ့ချုပ် (FIFA) က ပေးအပ်ချီးမြှင့်မည့်The Best FIFA Awards အကောင်းဆုံး ဆုပေးအပ်ပွဲအခမ်းအနားကို ဖေဖော်ဝါရီ ၂၇ ရက် (ယနေ့) တွင် ပြင်သစ်နိုင်ငံ ပါရီမြို့၌ ကျင်းပမည်ဖြစ်ကြောင်း သိရသည်။
The Best FIFA Awards ဆုပေးပွဲအခမ်းအနားကို မြန်မာစံတော်ချိန် ဖေဖော်ဝါရီ ၂၈ ရက် နံနက် ၀၀း၃၀ နာရီတွင် စတင် ကျင်းပရန် စီစဉ်ထားပြီး FIFA ၏ တရားဝင် YouTube Channel မှ တိုက်ရိုက်ထုတ်လွှင့်ပြသမည်ဖြစ်သလို ၂၀၂၀ ပြည့်နှစ်နောက်ပိုင်း ပထမဆုံးအကြိမ်အဖြစ် ဧည့်သည်များ တက်ရောက်ခွင့်ပြုမည်ဖြစ် သည်။ ၂၀၂၂ ခုနှစ် The Best FIFA ဆုပေးပွဲအခမ်းအနားတွင် အမျိုးသားကစားသမားဆု၊ အမျိုးသမီးကစားသမားဆု၊ အမျိုးသားနည်းပြဆု၊ အမျိုးသမီးနည်းပြဆု၊ အမျိုးသားဂိုးသမားဆု၊ အမျိုးသမီးဂိုးသမားဆု၊ ပွတ်ရှ်ကပ်စ် (အကောင်းဆုံးသွင်းဂိုး)ဆု၊ အကောင်းဆုံးပရိသတ်ဆုများအပြင် ကမ္ဘာ့အကောင်းဆုံးအမျိုး သားနှင့် အမျိုးသမီးအသင်းတို့ကို ရွေးချယ်သွားမည်ဖြစ်သည်။
အမျိုးသားကစားသမားဆုအတွက် အပြီးသတ်သုံးဦးစာရင်းတွင် တိုက်စစ်ကစားသမားများသာ ပါဝင်နေပြီး PSG အသင်း၏ အာဂျင်တီးနားလက်ရွေးစင် အသင်းခေါင်းဆောင် မက်ဆီနှင့် ပြင်သစ် လက်ရွေးစင်ကစားသမား ဘာပေ၊ ရီးယဲလ်အသင်း၏ ပြင်သစ်လက် ရွေးစင်ကစားသမား ဘန်ဇီမာတို့ ပါဝင်သည်။ ၎င်းတို့အနက် အာဂျင်တီးနားအသင်းနှင့်အတူ ၂၀၂၂ ကမ္ဘာ့ဖလားချန်ပီယံဆုအပြင် ယင်းပြိုင်ပွဲ၏ အကောင်းဆုံးကစားသမား (ရွှေဘောလုံး)ဆု၊ ဒုတိယဂိုးအများဆုံး (ငွေဖိနပ်) ဆု၊ တောင်အမေရိက-ဥရောပ ချန်ပီယံများဖလားဆု၊ PSG အသင်းနှင့် ၂၀၂၁-၂၀၂၂ ရာသီ လီဂူး-၁ ချန်ပီယံဆု၊ ၂၀၂၂ ပြင်သစ်စူပါဖလား ဆွတ်ခူးရရှိထားသည့် မက်ဆီက The Best FIFA ဆုကို ဆွတ်ခူးရယူနိုင်ရန် ရေပန်းအစားဆုံးဖြစ်နေကြောင်း သိရသည်။ မက်ဆီ (၃၅ နှစ်) သည် FIFA က ချီးမြှင့်သည့် အကောင်းဆုံးဆုကို FIFA ကမ္ဘာ့အကောင်းဆုံးကစားသမားဆုအမည်ဖြင့် တစ်ကြိမ်(၂၀၀၉)၊ FIFA Ballon d’Or ဆုအမည်ဖြင့် လေးကြိမ်(၂၀၁၀၊ ၂၀၁၁၊ ၂၀၁၂၊ ၂၀၁၅)၊ The Best FIFA Awards ဆုအမည်ဖြင့် တစ်ကြိမ် (၂၀၁၉) ရရှိထားသည်။
ဘာပေမှာ PSG အသင်းနှင့် လီဂူး-၁ ချန်ပီယံဆုရရှိထားပြီး ပြင်သစ်အသင်းနှင့် ကမ္ဘာ့ဖလားဗိုလ်လုပွဲတက်ရောက်ထားသလို ၂၀၂၂ Ballon d’Or ဆုရှင် ဘန်ဇီမာမှာလည်း ရီးယဲလ်အသင်းနှင့် လာလီဂါ ချန်ပီယံဆု၊ ချန်ပီယံလိဂ်ဖလား၊ စပိန်စူပါဖလား၊ ဥရောပစူပါဖလား ရရှိထားသည်။ The Best FIFA Awards ဆုကို ၂၀၂၁ သြဂုတ် ၈ ရက်မှ ၂၀၂၂ ဒီဇင် ဘာ ၁၈ ရက်အတွင်း စွမ်းဆောင်ရည်အပေါ် မူတည်၍ ရွေးချယ်ချီးမြှင့်ခြင်းဖြစ်သည်။
