ဝုလ်ဗ်အသင်းသည် ၂၀၂၁ ခုနှစ်တွင် အဆုံးသတ်သည့် ဘဏ္ဍာရေးနှစ်အတွက် အမြတ်ငွေ ပေါင် (၂၁.၁) သန်း ထွက်ပေါ်ခဲ့သည်ဟု ကြေညာခဲ့သည်။
ကိုဗစ်ရိုက်ခတ်မှုကြောင့် ကမ္ဘာ့ဘောလုံးလောကအတွင်း ကမောက်ကမဖြစ်ရပ်များရှိပြီး အသင်းအတော်များများ အရှုံးပေါ်ခဲ့သည့်တိုင် ဝုလ်ဗ်အသင်းသည် အမြတ်ငွေ ထွက်ပေါ်ခဲ့ခြင်းဖြစ်ပြီး ကလပ်အသင်း၏ ဘဏ္ဍာရေးအခြေအနေမှာ ခိုင်မာအားကောင်းဆဲဖြစ်သည်ဟု ကလပ်အသင်းက ကြေညာခဲ့သည်။
ဝုလ်ဗ်အသင်း၏ တစ်နှစ်တာအတွင်း ဝင်ငွေစုစုပေါင်းမှာ ပေါင်(၈၂.၇)သန်းရှိခဲ့ရာမှ ပေါင် (၁၂၂.၆) သန်းအထိ တိုးမြင့်လာခဲ့ခြင်းဖြစ်ပြီး အဓိကအားဖြင့် အပြောင်းအရွှေ့စျေးကွက်တွင် အမြတ်ငွေတိုးလာခြင်းက အဓိကဖြစ်ခဲ့သည်။
ဝုလ်ဗ်အသင်းသည် ၂၀၂၀ ဘဏ္ဍာရေး နှစ်တွင် ပေါင် (၁၇.၄၈)သန်းသာရှိခဲ့ရာမှ ယခုနှစ်အတွက် အမြတ်ငွေမှာ ပေါင် (၆၃.၆၈)သန်းအထိရှိခဲ့ခြင်းကြောင့် စုစုပေါင်း အမြတ်ငွေတိုးတက်လာခဲ့ခြင်းလည်းဖြစ်သည်။
ဝုလ်ဗ်အသင်းသည် ၎င်းင်းတို့အသင်း၏ ပေါ်တူဂီတောင်ပံတိုက်စစ်ကစားသမား ဂျိုတာအား လီဗာပူးလ်အသင်းထံသို့ ရောင်းချခဲ့သည့် ပြောင်းရွှေ့ကြေးမှာ ယင်းအပြောင်းအရွှေ့ကာလအတွင်း ပါဝင်ခဲ့ခြင်းကြောင့် အမြတ်ငွေများစွာ ထွက်ပေါ်ခဲ့ခြင်းလည်းဖြစ်သည်။
ထို့အတူ မတ်ဒိုဟာတီအား စပါးအသင်းထံသို့ ရောင်းချခဲ့ခြင်းနှင့် ဟယ်လ်ဒါကော်စတာအား လိဒ်စ်ယူနိုက်တက်အသင်းထံ ရောင်းချခဲ့ခြင်းတို့လည်းပါဝင်ကြောင်း သိရှိရသည်။
ဝုလ်ဗ်အသင်းသည် ဘဏ္ဍာရေးနှစ်တစ်နှစ်တာအတွင်း ပေါင်သန်း (၂၀)ကျော် အမြတ်ငွေထွက်ပေါ်ခဲ့ခြင်းမှာ နှစ်ပေါင်းများစွာအတွင်း ပထမဆုံးဖြစ်ပြီး အသင်း၏ ဘဏ္ဍာရေးအခြေအနေကြောင့် ကစားသမားသစ်များ ထပ်မံခေါ်ယူပြီး အသင်းအင်အားတိုးချဲ့သွားရန် စီစဉ်လျက်ရှိကြောင်းလည်း သိရှိရသည်။
