၂၀၂၀ Ballon d’Or ဆုကို လီဝန်ဒေါစကီးအား ပေးအပ်သင့်သည်ဟု မက်ဆီ ပြောကြားခဲ့ပြီး ကိုပါအမေရိကချန်ပီယံဆုကြောင့် ယခုနှစ်အကောင်းဆုံးဆု ရရှိခဲ့သည်ဟုလည်း ဝန်ခံ

နိုဝင်ဘာလ ၂၉ ရက်က ကျင်းပခဲ့သည့် ၂၀၂၁ Ballon d’Or ဆုပေးပွဲအခမ်းအနားတွင် အကောင်းဆုံးကစားသမားဆု ရရှိခဲ့သည့် PSG အသင်းမှ အာဂျင်တီးနားအသင်းခေါင်းဆောင် မက်ဆီက ၂၀၂၀ Ballon d’Or ဆုကို လီဝန်ဒေါစကီးအား ပေးအပ်သင့်သည်ဟု တိုက်တွန်းခဲ့သည်။

၂၀၁၉-၂၀ ဘောလုံးရာသီတွင် လီဝန် ဒေါစကီးမှာ အကောင်းဆုံးဆုများနှင့် ထိုက်တန်သူဟု ခြွင်းချက်မရှိ အသိအမှတ်ပြုခံရသူ ဖြစ်ပြီး Ballon d’Or ဆုကို ကမကထပြုချီးမြှင့်သည့် ပြင်သစ်ဘောလုံးမဂ္ဂဇင်းက ဗိုင်းရပ်စ်ကပ်ဘေးကြောင့် ၂၀၂၀ ခုနှစ်အတွက် ဆုချီး မြှင့်ပွဲ ပြုလုပ်မည်မဟုတ်ကြောင်း ယင်းဘောလုံးရာသီ မပြီးမီကတည်းက ကြေညာထားခြင်း ဖြစ်သည်။

မက်ဆီက “ကျွန်တော့်အဖို့ ဒီဆုကို ရောဘတ်(လီဝန်ဒေါစကီး)နဲ့ ယှဉ်ပြိုင်ခဲ့ရတာဟာလည်း ဂုဏ်ယူစရာတစ်ခုပါလို့ ပြောလိုပါတယ်။ လီဝန်ဒေါစကီးက ပြီးခဲ့တဲ့နှစ်ရဲ့ အကောင်းဆုံးဆိုတာ ကျွန်တော်တို့အားလုံး သဘောတူလက်ခံထားပါတယ်။ ပြင်သစ်ဘောလုံးမဂ္ဂဇင်အနေနဲ့ လီဝန်ဒေါစကီးကို သူ့ရဲ့ Ballon d’Or ဆုပေးသင့်တယ်လို့ ကျွန်တော် ယူဆပါတယ်။ ခင်ဗျားက အဲဒီဆုနဲ့ ထိုက်တန်ပါတယ်။ ခင်ဗျားရဲ့အိမ်မှာ အဲဒီဆု ရှိသင့်ပါတယ်”ဟု ဆုလက်ခံရယူပြီးနောက် ပြောကြားခဲ့သည်။

ထို့ပြင် ၎င်းက ယခုဆုသည် နိုင်ငံအသင်းနှင့် ကိုပါအမေရိကချန်ပီယံဆုကြောင့် ရရှိခဲ့ခြင်းသာဖြစ်သည်ဟုလည်း ဝန်ခံခဲ့သည်။ လီဝန်ဒေါစကီးမှာ ယခုနှစ်တွင် ပထမဆုံးအကြိမ် ထည့်သွင်းချီးမြှင့်သည့် အကောင်းဆုံးတိုက်စစ်မှူးဆု Striker of the Year နှင့်သာ ကျေနပ်နှစ်သိမ့်ခဲ့ရသည်။ လီဝန်ဒေါစကီးသည် ၂၀၁၉-၂ဝရာသီတွင် ၅၅ ဂိုးသွင်းယူကာ ဖလားသုံးလုံးချန်ပီယံဖြစ်ခဲ့သည်။