၂၀၂၀-၂၀၂၁ ရာသီအတွက် မန်ယူ အသင်း၏ ဘဏ္ဍာရေးရှင်းတမ်းကို ထုတ်ပြန်ရာ ဝင်ငွေရရှိမှု ထပ်မံလျော့ကျသွားပြီး အသားတင် ပေါင် ၉၂ သန်းကျော် အရှုံးပေါ်ခဲ့ကြောင်း သိရသည်။
ပြီးခဲ့သည့်ရာသီက COVID-19 ကပ် ရောဂါဖြစ်ပွားမှုကြောင့် တစ်ရာသီလုံးနီးပါး ပရိသတ်မပါဘဲ ကွင်းပိတ်ကစားခဲ့ရသဖြင့် ကွင်းဝင်ကြေးဝင်ငွေရရှိမှု အဓိကနစ်နာခဲ့ရပြီး ပေါင် ၇ ဒသမ ၁ သန်းသာရရှိကာ ၂၀၁၉- ၂၀၂၀ ရာသီထက် ၉၂ ရာခိုင်နှုန်း လျော့ကျ သွားခဲ့သည်။
ပရိသတ်များ ကွင်းအတွင်း ကြည့်ရှုခွင့်မရသဖြင့် ရုပ်သံမှထုတ်လွှင့်ပြသမှု ပိုများလာရာ ရုပ်သံထုတ်လွှင့်ခွင့်ဝင်ငွေမှာ ရာခိုင်နှုန်း ၈၀ ကျော် မြင့်တက်လာပြီး ပေါင် ၂၅၄ ဒသမ ၈ သန်းရရှိခဲ့သည်။ ထို့ကြောင့် တစ်ရာသီအတွင်း ဝင်ငွေစုစုပေါင်း ပေါင် ၄၉၄ ဒသမ ၁ သန်းရရှိခဲ့ပြီး ၂၀၁၉-၂၀၂၀ ရာသီတွင်ရရှိခဲ့သည့် ပေါင် ၅၀၉ သန်းထက် ၂ ဒသမ ၉ ရာခိုင်နှုန်း ကျဆင်းသွားကြောင်း သိရသည်။
မန်ယူအသင်းအနေဖြင့် COVID-19 ရောဂါ ဖြစ်ပွားမှုမရှိသေးသည့် ၂၀၁၈- ၂၀၁၉ ရာသီတွင် ပေါင် ၆၂၇ ဒသမ ၁ သန်း အထိ ဝင်ငွေရရှိခဲ့သည်။ ဝင်ငွေရရှိမှုလျော့ကျ သွားသဖြင့် အသားတင်အရှုံးပမာဏလည်း မြင့်တက်လာပြီး ၂၀၁၉-၂၀၂၀ ရာသီတွင် ပေါင် ၂၃ ဒသမ ၂ သန်းရှိရာမှာ ၂၀၂၀-၂၀၂၁ ရာသီတွင် ပေါင် ၉၂ ဒသမ ၂ သန်းသို့ မြင့်တက်လာကြောင်း သိရသည်။
ယခုနှစ်ကုန်တွင် မန်ယူအသင်း အမှု ဆောင်ဒုဥက္ကဋ္ဌအဖြစ်မှ အနားယူတော့မည့် အက်ဒ်ဝုဒ်ဝက်ကမူ အသင်းအနေဖြင့် ကပ်ရောဂါကဲ့သို့ အကြီးမားဆုံးစမ်းသပ်မှုကြုံတွေ့ ရသော်လည်း ခံနိုင်ရည်ရှိစွာ ရင်ဆိုင်နိုင်ခဲ့ သဖြင့် ဂုဏ်ယူကြောင်း ပြောကြားခဲ့သည်။
