၂၀၁၆-၁၇ ရာသီမှစတင်ရေတွက်ပါက လာဇီယိုအသင်းတိုက်စစ်မှူး အီမိုဘီလီသည် ဥရောပထိပ်တန်းလိဂ် (၅)ခု၌ တတိယမြောက်သွင်းဂိုး အများဆုံးကစားသမားအဖြစ် ရပ်တည်နေကြောင်း သိရသည်။
အီမိုဘီလီသည် ဘိုင်ယန်မြူးနစ်တိုက်စစ်မှူး လီဝန်ဒေါစကီးနှင့် PSG အသင်းတိုက်စစ်မှူး မက်ဆီတို့၏နောက် သွင်းဂိုးအများဆုံးကစားသမားအဖြစ် ရပ်တည်နေခြင်းဖြစ်သည်။
အဆိုပါကာလအတွင်း လီဝန်ဒေါစကီးက သွင်းဂိုး (၁၇၉)ဂိုး၊ မက်ဆီက သွင်းဂိုး (၁၆၃)ဂိုး သွင်းယူခဲ့ပြီး အီမိုဘီလီက စီရော်နယ်လ်ဒိုနှင့်အတူ သွင်းဂိုး (၁၄၀)ဖြင့် တတိယနေရာ၌ ရပ်တည်နေကြောင်း သိရသည်။
ဆလာနီတာနာအသင်းကို လာဇီယိုအသင်း (၃-ဝ)ဂိုးဖြင့် အနိုင်ရရှိသည့်ပွဲတွင် အီမိုဘီလီက (၂)ဂိုးသွင်းယူပြီး အဆိုပါဂုဏ်ယူဖွယ်ရာမှတ်တမ်းကိုပိုင်ဆိုင်ခဲ့ခြင်းဖြစ်သည်။
အီမိုဘီလီက “ကျွန်တော့်ကို အမြဲတမ်းကူညီပေးတဲ့ အသင်းဖော်တွေကို ကျေးဇူးတင်ပါတယ်။ ကျွန်တော်က သွင်းဂိုးတွေနဲ့ ဥရောပမှာ ထင်ရှားသူတစ်ဦးပါ။ ကျွန်တော့်ရဲ့ ကစားသမားဘဝမှတ်တမ်းမှာ ဥရောပဂိုးသွင်းဘုရင်ဆုအပါအဝင် အောင်မြင်မှုတချို့ ပိုင်ဆိုင်ပြီးပါပြီ။ ဝေဖန်သူတွေကို ကျွန်တော် တုံ့ပြန်စရာမလိုအောင် သက်သေပြပြီးသားပါ” ဟု ပြောကြားခဲ့သည်။
