ရီးယဲလ်မက်ဒရစ်အသင်းနည်းပြ အန်ဆယ်လော့တီက အသင်း၏ရာသီကြို လေ့ကျင့်ပြင်ဆင်မှုများတွင် ကစားသမားများအနေဖြင့် ပြီးခဲ့သည့် ၂၀၂၁-၂၂ ရာသီက ရရှိခဲ့သည့် (၁၄) ကြိမ်မြောက် ချန်ပီယံလိဂ်အောင်ပွဲကို မေ့ထားကာ လာမည့်ရာသီ (၁၅)ကြိမ်မြောက် ချန်ပီယံလိဂ်အောင်ပွဲအတွက်သာ အာရုံစိုက်ရန် တိုက်တွန်းပြောကြားခဲ့ကြောင်း စပိန်အားကစားသတင်းစာ Marca ကဖော်ပြခဲ့သည်။
ရီးယဲလ်မက်ဒရစ်အသင်းသည် လက်ရှိတွင် ရာသီကြိုလေ့ကျင့်ပြင်ဆင်မှုများပြုလုပ်ရန်နှင့် ခြေစမ်းပွဲများ ယှဉ်ပြိုင်ကစားရန် အမေရိကန်နိုင်ငံသို့ ရောက်ရှိနေပြီး ကစားသမားများအနေဖြင့် ပြီးခဲ့သည့်ရာသီက ရရှိခဲ့သော အောင်မြင်မှုများကိုမေ့လျော့ပစ်ရန်နှင့် ရာသီသစ် (၁၅)ကြိမ်မြောက်ချန်ပီယံလိဂ် ချန်ပီယံဆုအတွက် ပြင်ဆင်ထားရမည်ဖြစ်ကာ ယင်းအခြေအနေမှလွဲ၍ တခြားရွေးချယ်စရာမရှိကြောင်း အန်ဆယ်လော့တီက ပြောကြားခဲ့ခြင်းဖြစ်သည်။
ရီးယဲလ်အသင်းသည် ပြီးခဲ့သည့်ရာသီက အသင်းသမိုင်းတစ်လျှောက် (၃၅) ကြိမ်မြောက် လာလီဂါဆုဖလားနှင့် (၁၄)ကြိမ်မြောက် ချန်ပီယံလိဂ်ဆုဖလားတို့ကို ရရှိခဲ့ပြီး လာမည့်ရာသီတွင် ပြိုင်ပွဲ (၆)ခုအထိဝင်ရောက်ယှဉ်ပြိုင်ရမည်ဖြစ်ရာ အန်ဆယ်လော့တီအနေဖြင့် ဆုဖလားအောင်ပွဲများ ထပ်မံရယူနိုင်ရန် ဆန္ဒပြင်းပြနေကြောင်း စပိန်မီဒီယာများကဖော်ပြခဲ့ကြသည်။
ထို့ပြင် ၀ါရင့်ကစားသမားများဖြစ်သည့် ဘန်ဇီမာ၊ မိုဒရစ်၊ တိုနီကရို့စ်၊ ကာဗာဟယ်လ်၊ ကက်စီမီရို၊ နာချိုတို့ကလည်း အသင်းဖော်များ၊ လူငယ်ကစားသမားများနှင့် ဆွေးနွေးမှုများပြုလုပ်ခဲ့ကာ အသင်း၏အနာဂတ်နှင့်ပတ်သက်ပြီး သတိပေးပြောကြားမှုများရှိခဲ့ကြောင်း သိရသည်။
