စပါးအသင်းမှ ထုတ်ပယ်ခံရပြီးနောက် အသင်းလက်မဲ့ဖြစ်နေသည့် အာဂျင်တီးနားနည်းပြ ပိုချက်တီနိုက ဥရောပထိပ်တန်းလိဂ်ငါးခုအနက် မည်သည့်လိဂ်တွင်မဆို ကိုင်တွယ်မည်ဖြစ်ကြောင်း ထုတ်ဖော်ပြောကြားသည်။
ပိုချက်တီနိုသည် ပြီးခဲ့သည့် နိုဝင်ဘာတွင် စပါးအသင်းနည်းပြရာထူးမှ ထုတ်ပယ်ခံရခြင်းဖြစ်ပြီး အသင်းလက်မဲ့ဖြစ်နေသည်မှာ ကိုးလကြာမြင့်နေပြီဖြစ်သည်။
၎င်းသည် ပေါ်တူဂီကလပ် ဘင်ဖီကာနှင့် ပြင်သစ်လီဂူးကလပ် မိုနာကိုအသင်းတို့၏ ကမ်းလှမ်းမှုရရှိသော်လည်း ငြင်းပယ်ခဲ့သောကြောင့် ဆုဖလားစိန်ခေါ်နိုင်မည့်အသင်း ရှာဖွေနေခြင်းဟုတ်မဟုတ် စပိန်နိုင်ငံထုတ် El Pais သတင်းစာက မေးမြန်းစဉ် ယခုလို ဖြေကြားခဲ့ခြင်းဖြစ်သည်။
”ဥက္ကဋ္ဌ ဒါမှမဟုတ် ပရိသတ်တွေနဲ့ အယူအဆပိုင်းတူပြီး အောင်မြင်မှုနဲ့နီးစပ်လာအောင် လုပ်ပေးနိုင်တယ်လို့ ယုံကြည်တဲ့ကလပ်ကို ရှာဖွေနေတာပါ။ အဲဒီလိုကမ်းလှမ်းမှုမျိုးရောက်လာခဲ့ရင် ကျွန်တော်တို့နည်းပြအဖွဲ့အားလုံးက Yesလို့ ဖြေလိုက်မှာပါ။ ပရီးမီးယားလိဂ်က စျေးကွက်အမြင်ကောင်းလို့ စီးပွားရေးကဏ္ဍမှာ ပိုသာပါတယ်။ ဒါပေမဲ့ လာလီဂါ၊ စီးရီးအေ၊ လီဂူး-၁ နဲ့ ဘွန်ဒစ်လီဂါတို့ကလည်း အလားတူဖြစ်ပြီး အင်အားအရမ်းကောင်းပါတယ်”ဟု ပိုချက်တီနိုက ဆိုသည်။
ပိုချက်တီနိုသည် ဘာစီလိုနာအသင်းနည်းပြ ဆယ်တီယန်၏နေရာတွင် အစားထိုးခန့်အပ်ခံရနိုင်သူအဖြစ် ရေပန်းစားနေကြောင်း သိရသည်။
