ယခုနှစ် ဥရောပဘောလုံးလောကအတွင်း ပရိသတ်အများဆုံး ဘောလုံး ပွဲ(၃)ပွဲမှာ အံ့အားသင့်ဖွယ် အမျိုးသမီးဘောလုံးပွဲစဉ်များဖြစ်နေကြောင်း ESPN သတင်းဌာနက ဖော်ပြခဲ့သည်။
၂၀၂၂ ခုနှစ်အတွင်း ဥရောပ၏ ပရိသတ်အများဆုံးအဖြစ် စံချိန်တင်ထားသည့်ပွဲမှာ ဘာစီလိုနာနှင့် ဝုလ်ဖ်ဘတ်အသင်း ယှဉ်ပြိုင်ကစားသည့် ချန်ပီယံလိဂ် ဆီမီးဖိုင်နယ်ပွဲဖြစ်ကာ ပရိသတ်(၉၁၆၄၈)ဦးအထိ ကြည့်ရှုခဲ့ပြီး ယင်းပွဲမတိုင်မီ နူးကမ့်ကွင်း၌ ဘာစီလိုနာနှင့် ရီးယဲလ်မက်ဒရစ်အသင်းတို့ကစားခဲ့သည့် ချန်ပီယံလိဂ် ကွာတားဖိုင်နယ်ပွဲစဉ်ကို (၉၁၅၅၃)ဦး ဝင်ရောက်ခဲ့သည်။
တတိယအများ ဆုံးပွဲမှာ ပြီးခဲ့သည့်ရက်ပိုင်းက ယှဉ်ပြိုင်ခဲ့သည့် အမျိုးသမီး ယူရို-၂၀၂၂ ပြိုင်ပွဲ ဗိုလ်လုပွဲဖြစ်ပြီး ပရိသတ်ပေါင်း (၈၇၁၉၂)ဦးအထိရှိခဲ့သည်။
ယခင်က အမျိုးသမီးပွဲစဉ်များတွင် ပရိသတ်အများဆုံးအဖြစ် စံချိန်တင်ခဲ့သည်မှာ အမေရိကန်နှင့် တရုတ်အသင်း ယှဉ်ပြိုင်ကစားသည့် ၁၉၉၉ ကမ္ဘာ့ဖလားဗိုလ်လုပွဲဖြစ်ကာ (၉၀၁၈၅)ဦး ကြည့်ရှုခဲ့ပြီး ဘာစီလိုနာပွဲများက ချိုးဖျက်ခဲ့ခြင်းဖြစ်သည်။
