ဥရောပဇုန်၏ ၂၀၂၂ ကမ္ဘာ့ဖလား လက်ကျန်ခြေစစ်ပွဲများတွင် VAR စနစ် အသုံးပြုသွားမည်ဟု UEFA အတည်ပြု

ဥရောပဇုန်၏ ၂၀၂၂ ကမ္ဘာ့ဖလား လက်ကျန်ခြေစစ်ပွဲများ၌ VAR စနစ်ကို အသုံးပြုသွားမည်ဖြစ်ကြောင်း ဥရောပဘောလုံးအဖွဲ့ချုပ်(UEFA)က ကြာသပတေးနေ့တွင် အတည်ပြုကြေညာခဲ့သည်။

၂၀၂၂ ကမ္ဘာ့ဖလားဝင်ခွင့်အတွက် ယှဉ်ပြိုင်နေသည့် ဥရောပဇုန်ခြေစစ်ပွဲများကို ၂၀၂၁ ခုနှစ်၊ မတ်လကတည်းက စတင်ယှဉ်ပြိုင်ကစားခဲ့ခြင်းဖြစ်ပြီး လာမည့်စက်တင်ဘာလ၌ ဆက်လက်ယှဉ်ပြိုင်ရမည်ဖြစ်သည်။

UEFA သည် ကမ္ဘာ့ဖလားခြေစစ်ပွဲများ စတင်ကတည်းက VAR စနစ် အသုံးပြုရန် ရည်ရွယ်ခဲ့သော်လည်း ကပ်ဘေးကာလအတွင်း ဘောလုံးအဖွဲ့ချုပ်များအနေဖြင့် ဝန်ထုပ်ဝန်ပိုးမဖြစ်စေရန် ဆိုင်းငံ့ခဲ့ခြင်းဖြစ်ကြောင်းလည်း သိရသည်။

ယခုအခါ ကပ်ဘေးကာလ အဆုံးမသတ်သေးသော်လည်း ဥရောပနိုင်ငံအများစုမှာ ရင်ဆိုင်ကျော်လွှားနိုင်ခဲ့ပြီဖြစ်သောကြောင့် လက်ကျန်ကမ္ဘာ့ဖလားခြေစစ်ပွဲများ၌ VAR စနစ် ကို အသုံးပြုသွားရန် ဆုံးဖြတ်ခဲ့ခြင်းဖြစ်သည်။

ယင်းအတွက် ကမ္ဘာ့ဘောလုံးအဖွဲ့ချုပ်(FIFA)နှင့်လည်း သဘောတူညီမှု ရယူနိုင်ခဲ့ကြောင်း သိရသည်။ ၂၀၂၂ ကမ္ဘာ့ဖလား ဥရောပဇုန်ခြေစစ်ပွဲများမှာ စက်တင် ဘာလအတွင်း ပွဲစဉ်(၃)ပွဲ ယှဉ်ပြိုင်သွားရမည်ဖြစ်ပြီး နိုဝင်ဘာလအတွင်း၌ အုပ်စုပွဲစဉ်များ ပြီးဆုံးမည်ဖြစ်သည်။

UEFA က “ကျွန်တော်တို့ရဲ့ မူလအစီအစဉ်က ခြေစစ်ပွဲတွေ စတင်ကတည်းက VAR စနစ်ကို အသုံးပြုဖို့စီစဉ်မဲ့ ကိုဗစ်ကာလအတွင်း နည်းပညာအကူအညီထောက်ပံ့ပေးဖို့နဲ့ သက်ဆိုင်ရာဘောလုံးအဖွဲ့ချုပ်တွေရဲ့ အခက်အခဲကြောင့် အစီအစဉ်ကို ရွှေ့ဆိုင်းထားခဲ့ရတာဖြစ်ပါတယ်”ဟု ကြေညာချက်တွင် ဖော်ပြခဲ့သည်။

UEFA သည် အနာဂတ်၌ VAR စနစ်ကို ပိုမိုတွင်ကျယ်ရန် ရည်ရွယ်ထားပြီး အငြင်းပွားမှုများ တဖြည်းဖြည်းလျော့ကျလာမည်ဟု မျှော်လင့်ထားကြောင်းလည်း သိရသည်။ လက်ရှိအချိန်တွင် ဥရောပထိပ်သီးလိဂ်(၅)ခုစလုံး၌ VAR စနစ်ကို အသုံးပြုနေပြီဖြစ်သည်။