ဘာစီလိုနာအသင်း ဥက္ကဋ္ဌ လာပေါ်တာက ဥရောပစူပါလိဂ်အစီအစဉ်မှာ ရပ်ဆိုင်းသွားခြင်းမရှိသေးဘဲ အသက်ဝင်နေဆဲဖြစ်ကြောင်း ပြောကြားခဲ့သည်။
ဘာစီလိုနာ၊ ရီးယဲလ်မက်ဒရစ်နှင့် ဂျူဗင်တပ်စ်စသည့် သုံးသင်းမှာ ဥရောပစူပါလိဂ်မှ နုတ်ထွက်ကြောင်း မကြေညာဘဲ ကျန်ရှိနေသည့် ကလပ်အသင်းများ ဖြစ်ပြီး ဥရောပဘောလုံးအဖွဲ့ချုပ်(UEFA)၏အရေးယူမှုနှင့် ရင်ဆိုင်ရဖွယ်ရှိနေသည်။
သို့သော် လာပေါ်တာက ”ဒီပရောဂျက်က အသက်ဝင်နေဆဲပါပဲ။ အဲဒီပြိုင်ပွဲက ဘာစီလိုနာအတွက် တစ်ရာသီကို အနည်းဆုံး ယူရို သန်း ၇၀၀ လောက် ရရှိစေမှာပါ။ ဒီပြိုင်ပွဲနဲ့ ပတ်သက်လို့၊ ပြိုင်ပွဲအတွက် အဖွဲ့ဖွဲ့လို့၊ ကိုယ့်ကံကြမ္မာကို ကိုယ်တိုင်ဖန်တီးချင်တဲ့အတွက် တောင်းပန်စရာအကြောင်းမရှိပါဘူး”ဟု ဆိုသည်။
UEFA သည် ယင်းအသင်း(၃)သင်းကို ချန်ပီယံလိဂ်ပြိုင်ပွဲမှ ထုတ်ပယ်မည်ဟု သတင်းထွက်ခဲ့သော်လည်း ပြီးခဲ့သည့်ရက်ပိုင်းက လာမည့်ရာသီ ချန်ပီယံလိဂ်ပြိုင်ပွဲတွင် ယှဉ်ပြိုင်ခွင့်ပြုမည်ဟူသော အသံများလည်း ပေါ်ထွက်လာခဲ့သည်။
စူပါလိဂ်ပြိုင်ပွဲဝင်စာရင်းတွင် ပါဝင်ပြီး နောက်ပိုင်းမှ ပြန်လည်နုတ်ထွက်ခဲ့သည့်အသင်းများကိုမူ UEFA က ဒဏ်ငွေတပ်ရိုက်ကာ အရေးယူမှုများ ပြုလုပ်ခဲ့ပြီးဖြစ်သည်။
အစောဆုံးနုတ်ထွက်ခဲ့သည့် ပရီးမီးယားလိဂ်ထိပ်သီး မန်စီးတီး၊ မန်ယူ၊ လီဗာပူးလ်၊ ချယ်လ်ဆီး၊ အာဆင်နယ်နှင့် စပါးအသင်းများကို ဒဏ်ငွေအဖြစ် စုစုပေါင်း ပေါင်(၂၂)သန်း တပ်ရိုက်ခဲ့သည်။
အက်သလက်တီကို၊ အေစီမီလန်နှင့် အင်တာမီလန်အသင်းများသည် လာမည့်ရာသီအတွင်း ဥရောပပြိုင်ပွဲများမှ ဝင်ငွေ(၅)ရာခိုင်နှုန်းစီကို ဒဏ်ငွေအဖြစ် ပေးဆောင်ရမည့်အပြင် ဥရောပ၏ အောက်ခြေအဆင့်နှင့် လူငယ်ဘောလုံးလောကဖွံ့ဖြိုးရေးအတွက် စုပေါင်းပြီး ယူရို(၁၅)သန်း လှူဒါန်းရမည်ဖြစ်သည်။
