ဆွစ်ဇာလန်တရားရေးဝန်ကြီးဌာနက ကမ္ဘာ့ဘောလုံးအဖွဲ့ချုပ် (FIFA) နှင့် ဥရောပဘောလုံးအဖွဲ့ချုပ်(UEFA) တို့အနေဖြင့် ဥရောပစူပါလိဂ်စီမံကိန်းနှင့်ပတ်သက်ပြီး ရီးယဲလ်၊ ဘာစီလိုနာနှင့် ဂျူဗင်တပ်စ်အသင်းတို့ကို အရေးယူခြင်းမျိုး မပြုလုပ်နိုင်ကြောင်း သတိပေးခဲ့သည်ဟု Marca က ဖော်ပြခဲ့သည်။
ပြီးခဲ့သည့် ဧပြီလတွင် ပရီးမီးယားလိဂ်ထိပ်သီး (၆)သင်းအပါအဝင် ဥရောပထိပ်သီးကလပ်အသင်း (၁၂) သင်းသည် ဥရောပစူပါလိဂ်စီမံကိန်းကို ထုတ်ပြန်ခဲ့ပြီး လာမည့်သြဂုတ်လတွင် စတင်ကစားရန်စီစဉ်ခဲ့သည်။
သို့သော် ဘောလုံးအလွှာအသီးသီးမှကန့်ကွက်မှုကြောင့် ရက်ပိုင်းအတွင်းမှာပင် ပရီးမီးယားလိဂ်ထိပ်သီး (၆)သင်းအပါအဝင် အက်သလက်တီကို၊ အေစီမီလန်နှင့် အင်တာမီလန်တို့မှာ ယင်းပြိုင်ပွဲမှ နုတ်ထွက်ခဲ့ကြသည်။
ရီးယဲလ်၊ ဘာစီလိုနာနှင့် ဂျူဗင်တပ်စ်တို့မှာမူ ယခုအချိန်ထိ အဆိုပါပြိုင်ပွဲမှ နုတ်ထွက်ခြင်းမရှိသေးပေ။
ထို့ကြောင့် UEFA သည် အဆိုပါ (၃)သင်းအား UEFA ၏ စည်းမျဉ်းများကို ချိုးဖောက်ခြင်းရှိ၊ မရှိ စုံစမ်းနေပြီး ဥရောပပြိုင်ပွဲများတွင် ဝင်ရောက်ယှဉ်ပြိုင်ခွင့် (၂)နှစ်အထိ ပိတ်ပင်ခံရနိုင်ကြောင်း သုံးသပ်မှုများရှိနေသည်။
သို့သော် ဘာစီလိုနာဥက္ကဋ္ဌ လာပေါ်တာက အမှားမလုပ်သည့်အတွက် အပြစ်ပေးမခံနိုင်ဟု ဆိုထားသလို၊ ယခုအခါ ဆွစ်ဇာလန်တရားရေးဝန်ကြီးဌာနကပါ အရေးမယူနိုင်ကြောင်း FIFA နှင့် UEFA ကို စာပေးပို့ခဲ့ခြင်းဖြစ်သည်။
အဆိုပါစာတွင် UEFA နှင့် FIFA တို့ အနေဖြင့်ရီးယဲလ်၊ ဘာစီလိုနာနှင့် ဂျူဗင်တပ်စ်တို့ကို အရေးမယူနိုင်ကြောင်း၊ ၎င်းတို့နှင့်ဆန့်ကျင်သည့် ပြိုင်ပွဲသစ်၊ စိတ်ကူးသစ်များကို ကန့်သတ်ခြင်းမှာ မတရားကြောင်း ပါရှိသည်။
ဆွစ်ဇာလန်တရားရေးဝန်ကြီးဌာနမှာ FIFA နှင့် UEFA ကို လွှမ်းမိုးမှုရှိသည်ဟု AS က ဖော်ပြခဲ့သည်။
