ဥရောပစူပါလိဂ်စီမံကိန်းကို လက်ရှိအချိန်ထိ စွန့်လွှတ်ခြင်းမရှိသေးဘဲ ဖက်တွယ်ထားသည့် ရီးယဲလ်၊ ဘာစီလိုနာနှင့် ဂျူဗင်တပ်စ်အသင်းတို့အနေဖြင့် ဥရောပဘောလုံးအဖွဲ့ချုပ်(UEFA)မှ ချမှတ်မည့် ပြစ်ဒဏ်ကို ကြောက်ရမည်ဖြစ်ကြောင်း လာလီဂါအဖွဲ့ချုပ်(LFP) ဥက္ကဋ္ဌနှင့် UEFA ကော်မတီအဖွဲ့ဝင်ဖြစ်သူ တီဘက်စ်က သတိပေးပြောကြားခဲ့သည်။
UEFA သည် ဥရောပစူပါလိဂ်စီမံကိန်းကို တရားဝင်စွန့်လွှတ်ခြင်းမရှိသေးသည့် ရီးယဲလ်၊ ဘာစီလိုနာနှင့် ဂျူဗင်တပ်စ်အသင်းတို့ကို UEFa မှ ချမှတ်ထားသည့် စည်းမျဉ်း၊ စည်းကမ်းများကို ဖောက်ဖျက်ခြင်းရှိ၊ မရှိ စုံစမ်းစစ်ဆေးနေပြီး အဆိုပါ(၃)သင်းအနေဖြင့် ဥရောပပြိုင်ပွဲများတွင် ဝင်ရောက်ယှဉ်ပြိုင်ခွင့်(၂)နှစ်အထိ ပိတ်ပင်ခံရနိုင်ကြောင်း သတင်းများထွက်ပေါ်နေသည်။
သို့သော် ဘာစီလိုနာဥက္ကဋ္ဌ လာပေါ်တာက မိမိတို့အနေဖြင့် ဥရောပစူပါလိဂ်စီမံကိန်းအတွက် UEFA ကို တောင်းပန်မည်မဟုတ်သလို၊ ပြစ်ဒဏ်ချမှတ်ခံရပါကလည်း နိုင်ငံတကာအားကစားခုံရုံး(CAS) တွင် ရင်ဆိုင်ရန်အသင့်ရှိကြောင်းနှင့် မိမိတို့အနေဖြင့် တရားဝင်ဘောင်အတွင်းက ကြိုးပမ်းခဲ့ခြင်းဖြစ်ကြောင်း ပြောကြားခဲ့သည်။
ယခုအခါ LFP ဥက္ကဋ္ဌ တီဘက်စ်က ရီးယဲလ်၊ ဘာစီလိုနာနှင့် ဂျူဗင်တပ်စ်တို့အနေဖြင့် UEFA ၏ အသိအမှတ် မပြုသည့်အဖြစ်မျိုးနှင့်ရင်ဆိုင်ရနိုင်ကြောင်း ပြောကြားခဲ့ခြင်းဖြစ်သည်။
တီဘက်စ်က ”အခုအချိန်မှာ ကြောက်ရမှာက ရီးယဲလ်၊ ဘာစီလိုနာနဲ့ ဂျူဗင်တပ်စ်အသင်းတို့ ဖြစ်ပါတယ်။ သူတို့ (၃)သင်း မပါတဲ့ ချန်ပီယံလိဂ်ပြိုင်ပွဲကို ကျွန်တော် မစဉ်းစားချင်ပါဘူး။ ဒါပေမဲ့ တကယ်ဖြစ်လာနိုင်ပါတယ်။ ပိုဆိုးတာက UEFA အနေနဲ့ သူတို့ကို အသိအမှတ်မပြုတာမျိုးအထိ လုပ်လာနိုင်ပါတယ်။ ချန်ပီယံလိဂ်က သူတို့ထုတ်ပယ်ခံရမယ်ထင်တယ်။ ကြောက်ရမှာက သူတို့ပါ” ဟု ပြောကြားခဲ့သည်။
