အဲဗာတန်အသင်း၏ ဘောလုံးဒါရိုက်တာ မာဆယ်လ်ဘရန်းကိုခေါ်ယူရန် မန်ယူအသင်း ပစ်မှတ်ထားနေ

မန်ယူအသင်းသည် အဲဗာတန်အသင်း၏ ဘောလုံးဒါရိုက်တာ မာဆယ်လ်ဘရန်းအားခေါ်ယူရန် ပစ်မှတ်ထားနေကြောင်း Daily Mail သတင်းစာက ဖော်ပြခဲ့သည်။

အသက် (၅၈)နှစ်အရွယ်ရှိပြီဖြစ်သူ မာဆယ်လ်ဘရန်းသည် ပြီးခဲ့သည့်နွေရာသီအပြောင်းအရွှေ့ကာလအတွင်း ဟာမီးစ်ရိုဒရီဂွက်ဇ်၊ အယ်လန်၊ ဒူကူဟေအစရှိသော ကစားသမားများကို အဲဗာတန်အသင်းသို့ ရောက်ရှိအောင်ခေါ်ယူနိုင်ခဲ့ပြီး အဲဗာ တန်အသင်းတွင် သူ၏စွမ်းဆောင်မှုများနှင့်ပတ်သက်၍ မန်ယူအသင်းဘုတ်အဖွဲ့က မျက်စိကျနေကြောင်း သိရှိရသည်။

မာဆယ်လ်ဘရန်းသည် နယ်သာလန်ကလပ်အသင်းများဖြစ်သည့် RKC ဝယ်လ်ဝစ်၊ အယ်လ်ခမာ၊ PSVအစရှိသောအသင်းများ၌ ဘောလုံးဒါရိုက်တာအဖြစ် ဆောင်ရွက်ခဲ့ဖူးသူဖြစ်ပြီး ကစားသမား အပြောင်းအရွှေ့ကိစ္စရပ်များနှင့်ပတ်သက်၍ ကျွမ်းကျင်ပိုင်နိုင်သူတစ်ဦး ဖြစ်သည်။

မန်ယူအသင်းတာဝန်ရှိသူများသည် အသင်း၏ ကစားသမားအပြောင်းအရွှေ့အားနည်းမှုများကို ကုစားရန်အတွက် ဘောလုံးဒါရိုက်တာတစ်ဦးကို အသင်းသမိုင်းတစ်လျှောက် ပထမဦးဆုံးအကြိမ် ခန့်အပ်သွားမည်ဟု သတင်းများထွက်ပေါ်နေသည်။

ယင်းစာရင်းတွင် အေဂျက်စ်မှ ဗန်ဒါးဆားနှင့် အိုဗားမားစ်၊ မန်ယူနောက်ခံလူဟောင်း ရီယိုဖာဒီနန်၊ PSG အားကစားဒါရိုက်တာ အန်တီယိုဟင်းနရစ်၊ လက်စတာနှင့် အဲဗာတန်ဒါရိုက်တာဟောင်း စတိဗ်ဝက်ရှ် အစရှိသူတို့မှာလည်း မန်ယူဘောလုံး ဒါရိုက်တာရာထူးအတွက် ရေပန်းစားသူများတွင်ပါဝင်နေသည်။

မာဆယ်လ်ဘရန်းနှင့် အဲဗာတန်အသင်း ချုပ်ဆိုထားသောစာချုပ်မှာ ယခုရာသီကုန်တွင် သက်တမ်းကုန်ဆုံးမည်ဖြစ်ပြီး ၎င်းအား ရိုးမားအသင်းကလည်း စိတ်ဝင်စားနေကြောင်း သိရသည်။