လိဂ်ချန်ပီယံရှစ်ကလပ် ဒါဘီအသင်းနည်းပြ ရွန်နီက မိမိအနေဖြင့် အဲဗာတန်အသင်းအား ကိုင်တွယ်ခွင့်ရမည့် အခွင့်အရေးကို ငြင်းဆန်ပယ်ချခဲ့ကြောင်း ဖွင့်ဟပြောကြားခဲ့သည်။
အဲဗာတန်အသင်းသည် ဇန်နဝါရီ (၁၆)ရက်တွင် အသင်းနည်းပြ ဘင်နီတက်ဇ်ကို ရာထူးမှထုတ်ပယ်ပြီးနောက် ဒန်ကန်ဖာဂူဆန်ကို ယာယီနည်းပြအဖြစ် ခန့်အပ်ထားသော်လည်း အမြဲတမ်းနည်းပြ ခန့်အပ်ရန် စီစဉ်လျက်ရှိသည်။
ဒါဘီအသင်းနည်းပြ ရွန်နီမှာ ချယ်လ်ဆီးနည်းပြဟောင်း လမ်းပတ်၊ ဘယ်လ်ဂျီယံအသင်းနည်းပြ မာတီနက်ဇ်တို့နှင့် အဲဗာတန်နည်းပြရာထူးအတွက် ရေပန်းစားသူများစာရင်းတွင် ပါဝင်ခဲ့သည်။
သို့သော် ရွန်နီက ကစားသမားဘဝတွင် ကစားခဲ့သည့် အသင်းဟောင်း အဲဗာတန်အသင်းက နည်းပြရာထူးအတွက် အင်တာဗျူး ပြုလုပ်ရန် ဖိတ်ခေါ်မှုကို ငြင်းပယ်ခဲ့ကြောင်း ပြောကြားခဲ့ခြင်းဖြစ်သည်။
ရွန်နီက “အဲဗာတန်အသင်းက ကျွန်တော့်အေးဂျင့်ကို ချဉ်းကပ်ပြီး နည်းပြရာထူးအတွက် အင်တာဗျူးဖြေဖို့ ကျွန်တော့်ကို တောင်းဆိုခဲ့ပါတယ်။ ဒါပေမဲ့ ကျွန်တော် ငြင်းပယ်ခဲ့ပါတယ်။ ကျွန်တော့်အနေနဲ့ ပရီးမီးယားလိဂ်အသင်းတစ်သင်းကို ကိုင်တွယ်ဖို့ (၁၀၀)ရာခိုင်နှုန်းအသင့်ဖြစ်နေပြီလို့ ယုံကြည်ပါတယ်။ ဒါပေမဲ့ အခု ကျွန်တော်က ဒါဘီအသင်းရဲ့ နည်းပြဖြစ်ပြီး ဒီအလုပ်က ကျွန်တော့်အတွက် အရေးကြီးပါတယ်”ဟု ပြောကြားခဲ့သည်။
ရွန်နီသည် ဒါဘီအသင်းနှင့် ၂၀၂၃ ခုနှစ်အထိ စာချုပ်သက်တမ်းရှိနေသူဖြစ်ပြီး ဒါဘီအသင်းအတွက် အာရုံစိုက်ထားကြောင်းလည်း ပြောကြားခဲ့သည်။
