ရာထူးမှ ထုတ်ပယ်ခံခဲ့ရသည့် အဲဗာတန်အသင်းနည်းပြဟောင်း ရာဖာဘင်နီတက်ဇ်က အဲဗာတန်အသင်း၏ အသင်းတွင်း အခြေအနေကို သိရှိသူများသာ မိမိ၏ အခြေအနေကို နားလည်နိုင်မည်ဖြစ်ကြောင်းနှင့် အဲဗာတန်အသင်းပရိသတ်များကို ကျေးဇူး တင်ကြောင်း ကြေညာချက်ထုတ်ပြန်ခဲ့သည်။
ဘင်နီတက်ဇ်က အဲဗာတန်အသင်း၏ ဘဏ္ဍာရေးအခြေအနေနှင့် ဒဏ်ရာပြဿနာများသည် အလွန်ခက်ခဲဆိုးရွားသည့် အခြေအနေဖြစ်ကြောင်းနှင့် အဲဗာတန်အသင်း ဘုတ်အဖွဲ့အနေဖြင့် ယင်းအခြေအနေအပေါ် စိတ်ရှည်မှုရှိသင့်ကြောင်းလည်း ကြေညာချက်တွင် ပါရှိခဲ့သည်။
သူက ယခုကဲ့သို့ အဲဗာတန်အသင်း၏ ရလဒ်ဆိုးများအတွက် ကိုယ့်ကိုယ်ကို အနည်းငယ် အပြစ်တင်ခဲ့သော်လည်း ပြီးခဲ့သည့် နွေရာသီအပြောင်းအရွှေ့ကာလတွင် အပြောင်းအရွှေ့အသုံးစရိတ်မရရှိခဲ့ခြင်းနှင့် လက်ရှိ အသင်း၏ ဒဏ်ရာပြဿနာများအပေါ် အဓိကပြောကြားခဲ့ခြင်းလည်းဖြစ်သည်။
ဘင်နီတက်ဇ်က ”ဒါဟာ လွယ်ကူမှာမဟုတ်ဘူးဆိုတာ ကျွန်တော် ကြိုသိခဲ့ပြီးသားပါ။ ပြီးတော့ စိန်ခေါ်မှုကြီးတစ်ခုလည်းဖြစ်ခဲ့ပါတယ်။ ဒီမြို့အပေါ် ချစ်တဲ့စိတ်နဲ့ ဒီအလုပ်ကို လက်ခံခဲ့တာပါ။ ပထမဆုံးနေ့မှာကတည်းက ကျွန်တော်တို့ အစွမ်းကုန်ကြိုးစားခဲ့ပြီး လိုချင်တဲ့ရလဒ်တော့ မရခဲ့ပါဘူး”ဟု ပြောကြားခဲ့သည်။
