အဲဗာတန်အသင်း၏ ကိုလံဘီယာလက်ရွေးစင်ကွင်းလယ်တိုက်စစ်ကစားသမား ဟာမီးစ်ရိုဒရီဂွက်ဇ်က ယခုနွေရာသီအပြောင်းအရွှေ့ကာလအတွင်း အဲဗာတန်အသင်းမှထွက်ခွာဖွယ်ရှိကြောင်း ပရိသတ်များကို အရိပ်အမြွက် အသိပေးပြောကြားခဲ့သည်။
ဟာမီးစ်ရိုဒရီဂွက်ဇ်သည် အဲဗာတန်အသင်းမှ အီတလီလူမျိုးနည်းပြ အန်ဆယ်လော့တီ ထွက်ခွာသွားပြီးနောက် အသင်းမှထွက်မည်ဟု သတင်းများ ထွက်ပေါ်နေသူဖြစ်သည်။
ယခုအခါ ၎င်း၏အနာဂတ်နှင့်ပတ်သက်၍ ဟာမီးစ်ရိုဒရီဂွက်ဇ်က ပြောကြားခဲ့ခြင်းဖြစ်သည်။
ပရိသတ်များအား တိုက်ရိုက်ပြောကြားခဲ့သည့် Live Twitch Stream တွင် ၎င်းက ” ဘာတွေဖြစ်လာမလဲဆိုတာ ကျွန်တော် မသိသေးပါဘူး။ ကျွန်တော် ဘယ်မှာကစားမလဲဆိုတာလည်း မပြောတတ်သေးပါဘူး။ ကျွန်တော် ဆန္ဒဘယ်လိုရှိသည်ဖြစ်စေ ဒါဟာ ရှုပ်ထွေးပါတယ်”ဟု အရိပ်အမြွက်ပြောကြားခဲ့သည်။
အသက်(၂၉)နှစ်အရွယ်ရှိ ဟာမီးစ်ရိုဒရီဂွက်ဇ်သည် ပြီးခဲ့သည့်နှစ်နွေရာသီကမှ အဲဗာတန်အသင်းသို့ (၂)နှစ်စာချုပ်ဖြင့် ပြောင်းရွှေ့လာပြီး စာချုပ်သက်တမ်း တစ်နှစ်ကျန်ရှိနေသေးသည်။
၎င်းက အသင်းနှင့်စာချုပ်ဖျက်သိမ်းပြီး အလွတ်ထွက်ခွာခွင့်ရရှိရန် မျှော်လင့်နေကြောင်း သိရသည်။
ဟာမီးစ်ရိုဒရီဂွက်ဇ်သည် အဲဗာတန်အသင်းတွင် တစ်ပတ်လစာ ပေါင်(၂)သိန်းဝန်းကျင်ရရှိနေကြောင်း သတင်းများက ဖော်ပြခဲ့သည်။
ဆီဗီလာ၊ အေစီမီလန်အသင်းများက ၎င်းကိုခေါ်ယူရန် စိတ်ဝင်စားနေကြောင်း သိရသည်။
