ဘာစီလိုနာတိုက်စစ်မှူးသစ် အဂွဲရိုးသည် အောက်တိုဘာလကုန်ပိုင်းတွင်မှ အသင်းအတွက် ပွဲထွက်ကစားနိုင်ဖွယ်ရှိနေကြောင်း သိရသည်။
အာဂျင်တီးနားတိုက်စစ်မှူး အဂွဲရိုး (၃၃ နှစ်) သည် ပြီးခဲ့သည့်နွေရာသီအပြောင်းအရွှေ့တွင် မန်စီးတီးအသင်းမှ ပြောင်းရွှေ့ကြေးအလွတ်ဖြင့် ရောက်ရှိလာခဲ့သူဖြစ်သည်။
သို့သော် အဂွဲရိုးသည် ပြီးခဲ့သည့်သြဂုတ်လက အသင်း၏ လေ့ကျင့်ရေးအစီအစဉ်တွင် ခြေသလုံးဒဏ်ရာရရှိခဲ့ပြီး ယင်းကတည်းက အနားယူနေခဲ့ရသည်။
ထို့ကြောင့် အဂွဲရိုးသည် လက်ရှိအချိန်အထိ ဘာစီလိုနာအတွက် ပွဲကစားနိုင်ခြင်းမရှိသေးဘဲ အောက်တိုဘာလကုန်ပိုင်းတွင်မှ ပြန်ကစားနိုင်ဖွယ်ရှိကြောင်း စပိန်မီဒီယာများက ဖော်ပြနေကြသည်။
စပိန်အားကစားသတင်းစာ Marca ၏ ဖော်ပြချက်အရ အဂွဲရိုးအနေဖြင့် အောက်တိုဘာ (၂၇)ရက်တွင်ကစားမည့် ဗယ်လက်ကာနိုအသင်းနှင့် လာလီဂါအဝေးကွင်းပွဲစဉ် သို့မဟုတ် နိုဝင်ဘာ (၁)ရက်တွင်ကစားမည့် အလာဗတ်စ်အသင်းနှင့် လာလီဂါအိမ်ကွင်းပွဲစဉ်တွင် ဘာစီလိုနာအသင်းအတွက် စတင်ပွဲထွက်ဖွယ်ရှိနေကြောင်း သိရသည်။
