စီးရီးအေထိပ်သီး အေစီမီလန်နှင့် ဂျူဗင်တပ်စ်သည် စူပါလိဂ်အိပ်မက်ကို ဆက်လက်ဖက်တွယ်ထားလျှင် စီးရီးအေပြိုင်ပွဲမှ ထုတ်ပယ်ခံရနိုင်သည်ဟု အီတလီဘောလုံး အဖွဲ့ချုပ်(FIGC) က ကြေညာခဲ့သည်။
စူပါလိဂ်ပြိုင်ပွဲယှဉ်ပြိုင်မည့် အသင်းစာရင်းတွင် အမည်ပေါက်ခဲ့သည့် စီးရီးအေထိပ်သီးသုံးသင်းအနက် အင်တာမီလန်အသင်း က ပြိုင်ပွဲမှနုတ်ထွက်ကြောင်း အတည်ပြုကြေ ညာထားပြီး အေစီမီလန်နှင့် ဂျူဗင်တပ်စ်အသင်းများမှာ တရားဝင်နုတ်ထွက်ရခြင်းမရှိသေးကြောင်း သိရသည်။
အေစီမီလန်အသင်းက စူပါလိဂ်ပြိုင်ပွဲနှင့်ပတ်သက်ပြီး ကြေညာချက်ထုတ်ပြန်ရာ၌ အသင်းပရိသတ်များကို တောင်းပန်ကြောင်းသာ ထုတ်ပြန်ထားပြီး ဂျူဗင်တပ်စ်အသင်းက မူ စူပါလိဂ်ပြိုင်ပွဲမှာ မူလစီစဉ်ထားသည့်အတိုင်း ကျင်းပနိုင်တော့မည်မဟုတ်ဟုသာ သတင်းထုတ်ပြန်ခဲ့သည်။
ယင်းအခြေအနေနှင့်ပတ်သက်ပြီး FIGC ဥက္ကဋ္ဌဖြစ်သူ ဂရာဗီနာက ” လက်ရှိအချိန်မှာ စူပါလိဂ်ကနေ ဘယ်အသင်းတွေ ဆက်ရှိနေပြီး ဘယ်အသင်းတွေ နုတ်ထွက်မလဲဆိုတာနဲ့ ပတ်သက်ပြီး သတင်းအသစ် မရှိသေးပါဘူး။ ဒါပေမဲ့ ဇွန်လ ၂၁ ရက်မှာ စီးရီးအေပြိုင်ပွဲဝင် အသင်းတွေအဖြစ် ရှိနေတဲ့အသင်းတွေဟာ နောက်ထပ်သီးခြားပြိုင်ပွဲတစ်ခု ထပ်ပြီးယှဉ်ပြိုင်လို့မရပါဘူး။ အဲဒီလိုယှဉ်ပြိုင်မယ့်အသင်း တွေကို ကျွန်တော်တို့က စီးရီးအေအပါအဝင် ပြိုင်ပွဲအားလုံးက ထုတ်ပယ်သွားမှာပါ” ဟု သတင်းစာရှင်းလင်းပွဲတွင် ပြောကြားခဲ့သည်။
