ကြာသပတေးနေ့က နယူးကာဆယ်အသင်းအား အနိုင်ရသည့်ပွဲတွင် အဲဗာတန်အသင်းအတွက် အီဝိုဘီသွင်းယူခဲ့သည့် အနိုင်ဂိုးမှာ ၂၀၀၆-၂၀၀၇ ရာသီနောက်ပိုင်း ပရီးမီးယားလိဂ်ပြိုင်ပွဲတွင် ဒုတိယမြောက် နောက်အကျဆုံးသွင်းဂိုးအဖြစ် မှတ်တမ်းဝင် ခဲ့ကြောင်း သိရသည်။
ပရီးမီးယားလိဂ် ပွဲစဉ် (၂၀) ပွဲကျန်အဖြစ် အဲဗာတန်နှင့် နယူးကာဆယ်အသင်းတို့ ဂူဒီဆင်ပတ်ခ်ကွင်း၌ ယှဉ်ပြိုင်ကစားခဲ့ကြပြီး အိမ်ရှင်အဲဗာတန်အသင်းက ပွဲပြီးခါနီး နာကျင်အချိန်ပို ၉၈ မိနစ် ၁၉ စက္ကန့်တွင် သွင်းယူပေးသည့် တောင်ပံကစားသမား အီဝိုဘီ၏ တစ်လုံးတည်းသောဂိုးဖြင့် နိုင်ပွဲရရှိခဲ့သည်။
ယင်းပွဲတွင် ပရိသတ်တစ်ဦး ကွင်းအတွင်း ပြေးဝင်လာပြီးနောက် ဂိုးတိုင်နှင့် ၎င်း၏လည်ပင်းကို ဇစ်ကြိုးဖြင့်ချည်ခဲ့သောကြောင့် ပွဲအား ရှစ်မိနစ်ခန့် ရပ်နားခဲ့ရသဖြင့် နာကျင်အချိန်ပိုကို ကိုးမိနစ်အထိ ခွင့်ပြုပေးခဲ့ခြင်းဖြစ်သည်။
ပွဲချိန် ၈၃ မိနစ်တွင် အဲဗာတန်အသင်းကွင်းလယ်လူ အယ်လန် တိုက်ရိုက်အနီကတ်ဖြင့် ထုတ်ပယ်ခံရသောကြောင့် တစ်ယောက်လျော့သွားသော်လည်း အဖိုးတန်အနိုင်ဂိုးကို ၉၈ မိနစ် ၁၉ စက္ကန့်တွင် ကယ်လ်ဗတ်လူဝင်၏ ပေးပို့မှုမှတစ်ဆင့် အီဝိုဘီက သွင်းယူပေးခဲ့သည်။
အီဝိုဘီ၏သွင်းဂိုးမှာ အချက်အလက်များ စတင်ကောက်ယူသည့် ၂၀၀၆-၂၀၀၇ ရာသီနောက်ပိုင်း ပရီးမီးယားလိဂ်တွင် ဒုတိယမြောက် နောက်အကျဆုံးသွင်းဂိုးဖြစ်လာပြီး နောက်အကျဆုံးဂိုးအဖြစ် ၂၀၂၀ စက်တင်ဘာတွင် မန်ယူအသင်းကွင်းလယ်လူ ဘရူနိုဖာနန်ဒက်စ်က ၉၉ မိနစ် ၄၅ စက္ကန့်ဖြင့် စံချိန်တင်ထားသည်။
အဲဗာတန်အသင်းအနေဖြင့် ပရီးမီးယား လိဂ်တွင် လေးပွဲဆက် ရှုံးနိမ့်မှုကို ရပ်တန့်နိုင်ခဲ့ပြီး ၂၇ ပွဲကစား၊ ၂၅ မှတ်ရရှိကာ တန်းဆင်းဇုန် အဆင့် ၁၈ နေရာမှ ဝက်ဖို့ဒ်အသင်းထက် နှစ်ပွဲလျော့၊ သုံးမှတ်အသာရသွားပြီဖြစ်သောကြောင့် ဖိအားအနည်းငယ်သက်သာသွားပြီဖြစ်သည်။
