အီရန်ဘောလုံးအဖွဲ့ချုပ်(FFIRI)သည် အီရန်နိုင်ငံအလံတွင်ပါရှိသည့် အစ္စလာမ်အမှတ်တံဆိပ်ကိုဖြုတ်၍ လူမှုမီဒီယာတွင်ဖော်ပြသော အမေရိကန်အသင်းအား ကမ္ဘာ့ဖလားပြိုင်ပွဲမှ ထုတ်ပယ်ရန် ကမ္ဘာ့ဘောလုံးအဖွဲ့ချုပ်(FIFA)ထံ တောင်းဆိုထားကြောင်း သိရသည်။
အမေရိကန်အမျိုးသားဘောလုံးအသင်း၏ တရားဝင် လူမှုမီဒီယာစာမျက်နှာများဖြစ်သည့် Twitter၊ Instagram၊ Facebook စသည်တို့တွင် အီရန်-အမေရိကန်ပွဲစဉ်အကြို ဖော်ပြရာတွင် အီရန်နိုင်ငံအလံ၏အလယ်၌ ပါရှိသည့် အစ္စလာမ်အမှတ်တံဆိပ်ကိုဖြုတ်၍ အစိမ်း၊ အဖြူ၊ အနီရောင် အလျားလိုက် သုံးရောင်ပါဝင်သည့်အလံကို ပြုပြင်ဖန်တီးဖော်ပြထားသောကြောင့် အီရန်ဘောလုံးအဖွဲ့ချုပ်က FIFA ထံ တိုင်ကြားခဲ့ခြင်းဖြစ်သည်။
”ပရော်ဖက်ရှင်နယ်မပီသတဲ့ လုပ်ရပ်တစ်ခုအနေနဲ့ အမေရိကန်ဘောလုံးအဖွဲ့ချုပ်ရဲ့ Instagem မှာ အီရန်နိုင်ငံအလံမှာပါဝင်တဲ့ အလ္လာဟ်အရှင်မြတ်သင်္ကေတကို ဖယ်ရှားထားပါတယ်။ ဒီကိစ္စအတွက် အမေရိကန်ဘောလုံးအဖွဲ့ချုပ်ကို အလေးအနက်သတိပေးဖို့ အီရန်ဘောလုံးအဖွဲ့ချုပ်က FIFA ဆီ အီးမေးလ်ပေးပို့ပြီး တောင်းဆိုထားပါတယ်”ဟု အီရန်နိုင်ငံပိုင် သတင်းအေဂျင်စီဖြစ်သည့် IRNA က ဖော်ပြသည်။
အမေရိကန်ဘောလုံးအဖွဲ့ချုပ်ကမူ အီရန်၏တရားဝင်အလံ အသုံးမပြုခြင်းမှာ အခြေခံလူ့အခွင့်အရေးအတွက် အီရန်နိုင်ငံ၌ တိုက်ပွဲဝင်နေကြသည့် အမျိုးသမီးများကို အားပေးထောက်ခံလို၍ဖြစ်ကြောင်း ရှင်းလင်းထားသည်။
ယင်းသတင်းများ ထွက်ပေါ်လာပြီးနောက် အမေရိကန်အသင်းအနေဖြင့် ပြုပြင်ဖန်တီးထားသောအလံကို ပယ်ဖျက်၍ မူလအလံကို ပြန်လည်အသုံးပြုထားကြောင်း သိရသည်။
အမေရိကန်ဘောလုံးအဖွဲ့ချုပ် ပြောရေးဆိုခွင့်ရှိသူတစ်ဦးကမူ ”ကျွန်တော်တို့အနေနဲ့ အီရန်အမျိုးသမီးတွေကို အားပေးထောက်ခံနေဆဲပါပဲ”ဟု ပြောကြားသည်။
အီရန်နှင့် အမေရိကန်မှာ နိုင်ငံရေးအရ ဆက်ဆံရေးတင်းမာသည့် အခြေအနေရှိသလို ၁၉၈၀ ပြည့်နှစ်ကတည်းက နှစ်နိုင်ငံအကြား သံတမန်ဆက်ဆံရေး ဖြတ်တောက်ထားကြောင်း သိရသည်။
စက်တင်ဘာလအတွင်း အီရန်နိုင်ငံ၌ အသက် ၂၂ နှစ်အရွယ် အမျိုးသမီးတစ်ဦး ရဲစခန်း၌ ဖမ်းဆီးထိန်းသိမ်းခံထားရစဉ် သေဆုံးခဲ့ပြီးနောက် နိုင်ငံတစ်ဝန်း ဆန္ဒပြပွဲများ ဖြစ်ပွားလျက်ရှိပြီး လုံခြုံရေးတပ်ဖွဲ့၏ အကြမ်းဖက်ဖြိုခွင်းမှုကြောင့် သေဆုံးသူ ၄၀၀ ကျော်ရှိသလို ၁၇ç၀၀၀ ဝန်းကျင် ဖမ်းဆီးခံထားရသည်။
အီရန်အစိုးရကမူ အဆိုပါဆန္ဒပြပွဲများမှာ အမေရိကန်အပါအဝင် တိုင်းတစ်ပါးရန်သူများ၏ ကြိုးကိုင်မှုကြောင့် ဖြစ်ပွားနေရကြောင်း စွပ်စွဲထားသည်။
သည် အီရန်နိုင်ငံအလံတွင်ပါရှိသည့် အစ္စလာမ်အမှတ်တံဆိပ်ကိုဖြုတ်၍ လူမှုမီဒီယာတွင်ဖော်ပြသော အမေရိကန်အသင်းအား ကမ္ဘာ့ဖလားပြိုင်ပွဲမှ ထုတ်ပယ်ရန် ကမ္ဘာ့ဘောလုံးအဖွဲ့ချုပ်(FIFA)ထံ တောင်းဆိုထားကြောင်း သိရသည်။){kind=link}