ဂန်းနား ကြယ်ပွင့်လေး ဘူကာရို ဆာကာ ကတော့ ဒီမနက် အိုးထရက်ဖိုဒ့်ကွင်းမှာ ကစားခဲ့တဲ့ မြောက်မက်စီ ဒိုးနီးယား နဲ့ ပွဲမှာ သူ့ရဲ့ စီနီယာ ကစားသမား ဘဝ ပထမဆုံး ဟက်ထရစ် ကို ရရှိ သွားခဲ့ပါတယ် ။ မော်လ်တာ နဲ့ ပွဲမှာ ဒဏ်ရာကြောင့် ပထမပိုင်း အပြီး လူစားလဲ ခံခဲ့ရတဲ့ ဆာကာ ဟာ မြောက်မက်စီဒိုးနီးယား နဲ့ ပွဲမှာလည်း ပွဲထွက် လူစာရင်းမှာ ထပ်မံ ပါဝင် လာခဲ့ပါတယ် ။
ဆာကာ ဟာ အင်္ဂလန် အတွက် ပထမပိုင်းမှာ ညာခြေ နဲ့ သွင်းဂိုး တစ်ဂိုး ၊ ဒုတိယပိုင်းမှာ ဘယ်ခြေနဲ့ သွင်းဂိုး ၂ ဂိုး သွင်းယူ ခဲ့တာ ဖြစ်ပြီး Player of the Match ဆုပါ ရရှိ သွားခဲ့ပါတယ် ။ မြောက်မက်စီဒိုးနီးယား နဲ့ ပွဲမှာ ဆာကာ ဟာ ဘောလုံး ထိချက် ၂၉ ကြိမ် ၊ ဂိုးကန်သွင်းချက် ၄ ကြိမ် လုပ်ခဲ့ပြီး ၊ ၄ ကြိမ် စလုံး ဂိုးပေါက်တည့်ခဲ့ကာ ဟက်ထရစ် ရရှိခဲ့တာ ဖြစ်ပါတယ် ။
ဆာကာ ဟာ ဝဲလ်ကော့ နောက်ပိုင်း အင်္ဂလန် အတွက် ဟက်ထရစ် သွင်း နိုင်တဲ့ ပထမဆုံး အာဆင်နယ် ကစားသမား ဖြစ်လာခဲ့သလို အင်္ဂလန် အသင်းရဲ့ ဒုတိယ အသက်ငယ်ဆုံး ဟက်ထရစ်ရှင်လည်း ဖြစ်လာခဲ့ပါတယ် ။ ဆာကာ ဟာ အသက် ၂၁ နှစ် အရွယ်မှာတင် အင်္ဂလန် အတွက် ၁၁ ဂိုး အထိ သွင်းထားပြီး ဖြစ်ပါတယ် ။
ပွဲအပြီး အင်တာဗျူးမှာတော့ ဆာကာ က ဟက်ထရစ် သွင်းနိုင်ခဲ့တဲ့ အပေါ် ” စကားလုံးတွေ နဲ့ ဖော်ပြလို့ မရနိုင်တဲ့ ခံစားချက် မျိုးလို့ ကျနော် ကတော့ ဆိုချင်ပါတယ် ။ ကျနော် အခု ဘယ်လို ခံစားနေရသလဲ ဆိုတာ ကျနော် ကိုယ်တိုင် မဖော်ပြတတ်ပါဘူး ၊ ကျနော် အရမ်း ပျော်နေပါတယ် ။ ”
” ဒီနေ့ည ကျနော်တို့ အသင်းရဲ့ ကစားပုံ စွမ်းဆောင်ရည်က ထူးရှယ်ပါပဲ ၊ တောင်ပံ နှစ်ဖက်မှာ ကျနော် နှင့် ရက်ရှ်ဖိုဒ့် နှစ်ဦး စလုံး လျင်လျင်မြန်မြန် ထက်ထက်မြက်မြက် နဲ့ ပြေးလွှား ကစားပြီး တိုက်စစ်ဆင်မှုတွေ တိုက်ရိုက် ပြုလုပ်ခဲ့ပါတယ် ၊ သူတို့ ကျနော်တို့ကို လုံးဝ မထိန်းချုပ် နိုင်ခဲ့ပါဘူး ။ ” လို့ ပြောကြား သွားခဲ့ပါတယ် ။
