အာနိုးလ်၏ဒဏ်ရာပြဿနာမှာ အသင်းအတွက် ကြီးမားသည့်ထိုးနှက်ချက်ဖြစ်ကြောင်း လီဗာပူးလ်လက်ထောက်နည်းပြ ပတ်လင်ဒါ ပြောကြား

လီဗာပူးလ်အသင်းလက်ထောက်နည်းပြ ပတ်လင်ဒါက အသင်းညာနောက်ခံကစားသမား အာနိုးလ်၏ ဒဏ်ရာပြဿနာမှာ မိမိတို့အသင်းအတွက် ကြီးမားသည့်ထိုးနှက်ချက်ဖြစ်ပြီး ၎င်းမကစားနိုင်ချိန်တွင် အသင်းအတွက် ကိုက်ညီမည့်ကစားကွက်သစ်ကို ရှာဖွေရမည်ဖြစ်ကြောင်း ပြောကြားခဲ့သည်။

အသက် (၂၅) နှစ်အရွယ်ရှိ အင်္ဂလန်လက်ရွေးစင်နောက်ခံကစားသမား အာနိုးလ်သည် ဇန်နဝါရီ (၆) ရက်က အာဆင်နယ်အသင်းအား (ဝ-၂) ဂိုးဖြင့် အနိုင်ရခဲ့သည့် FA ဖလား တတိယအဆင့်ပွဲစဉ်တွင် ဒူးဒဏ်ရာရရှိခဲ့ကြောင်း သိရသည်။

အဆိုပါဒဏ်ရာကြောင့် အာနိုးလ်အနေဖြင့် (၃)ပတ်ခန့် အနားယူရဖွယ်ရှိကြောင်း လီဗာပူးလ်လက်ထောက်နည်းပြ ပတ်လင်ဒါက အတည်ပြုပြောကြားခဲ့သည်။ လီဗာပူးလ်အသင်းသည် လက်ရှိတွင် ဆာလာနှင့် အန်ဒိုတို့ကို ဒေသဆိုင်ရာပြိုင်ပွဲများအတွက် လက်လွှတ်ထားရပြီး အသင်းအဓိက ကစားသမားများ ဒဏ်ရာပြဿနာများပြားနေချိန်တွင် အာနိုးလ် ဒဏ်ရာထပ်ရခဲ့ခြင်းမှာ အသင်းအတွက် ထိုးနှက်ချက်ဖြစ်လာခဲ့သည်။ 

ပတ်လင်ဒါက “အာနိုးလ်ရဲ့ ဒူးအရွတ်အနည်းငယ်စုတ်ပြဲသွားတာပါ။ သူ (၃)ပတ်လောက် နားရပါလိမ့်မယ်။ ဒါက ကျွန်တော်တို့အသင်းအတွက် ကြီးမားတဲ့ထိုးနှက်ချက်ပါပဲ။ သူ့ကို ကျွန်တော်တို့ လွမ်းနေရတော့မှာပါ။ သူက အသင်းရဲ့ကစားပုံကို လိုက်လျောညီထွေဖြစ်အောင် လုပ်နိုင်သူဖြစ်ပြီး သူမကစားနိုင်ချိန်မှာ ကစားကွက်အသစ်တစ်ခုကို ကျွန်တော်တို့ ရှာဖွေရမှာပါ။ သူက ကျွန်တော်တို့ လိုအပ်တဲ့နေရာတွေကို ဘောလုံးပေးပို့နိုင်သူဖြစ်လို့ သူ့ကို ဆုံးရှုံးရတာ တော်တော်ဆိုးပါတယ်” ဟု ပြောကြားခဲ့သည်။

အာနိုးလ်သည် အဆိုပါဒဏ်ရာကြောင့် ဇန်နဝါရီ (၁၀)ရက်က ကစားခဲ့သည့် ဖူလ်ဟမ်နှင့် လိဂ်ဖလားဆီမီးဖိုင်နယ် ပထမအကျော့ပွဲကို လွဲချော်ခဲ့သလို၊ လီဗာပူးလ်၏ နောက်ထပ် ပွဲစဉ် (၃)ပွဲခန့်ကိုလည်း လွဲချော်ဖွယ်ရှိနေကြောင်း သိရှိရသည်။

လီဗာပူးလ်အသင်းသည် ယခုရာသီ ပြိုင်ပွဲလေးရပ်စလုံးတွင် အခြေအနေကောင်းနေပြီး ပရီးမီးယားလိဂ်ပွဲစဉ် (၂၀) အပြီးတွင်လည်း ရမှတ် (၄၅)မှတ်ဖြင့် ဦးဆောင်နေသည်။