အာဆင်နယ် အသင်းဟာ လာမယ့် ရာသီသစ် အတွက် ကြိုတင် ပြင်ဆင်မှုတွေ စတင် ပြုလုပ် နေပြီ ဖြစ်ပြီး နုရင်ဘတ် အသင်း နဲ့ ခြေစမ်းပွဲ ကစားဖို့ရာ ဂျာမနီ ကို ထွက်ခွာ သွားခဲ့ပြီ ဖြစ်ပါတယ် ။ အာဆင်နယ် အသင်း ရဲ့ ဂျာမနီ ခြေစမ်းပွဲ ခရီးစဉ် မှာ အကယ်ဒမီထွက်ဆယ်ကျော်သက် ကစားသမား ၃ ဦးလည်း လိုက်ပါ သွားခဲ့ပါတယ် ။
သူတို့ကတော့ ပရိသတ်တွေနဲ့ သိပ်မစိမ်းတဲ့ ရူရယ်ဝေါလ်တာစ် ၊ မိုင်းလီဝစ်စကယ်လီ နှင့် နွမ်နယ်ရီ တို့ပဲ ဖြစ်ပါတယ် ။ နွမ်နယ်ရီ ဟာ အာဆင်နယ် အသင်းကြီးမှာ ပါဝင် ကစားခဲ့ဖူးသူ ဖြစ်ပြီး ပရီးမီးယားလိဂ် သမိုင်းတစ်လျှောက် အသက် အငယ်ဆုံး ကစားသမား အဖြစ် စံချိန်သစ် တင်ထားသူလည်း ဖြစ်ပါတယ် ။
မန်စီးတီး နှင့် ချဲလ်ဆီး တို့ရဲ့ ကမ်းလှမ်းမှုကို ငြင်းပယ်ပြီး အာဆင်နယ်မှာ ဆက်နေဖို့ ဆုံးဖြတ်ခဲ့တဲ့ နွမ်နယ်ရီ ဟာ အသက် ၁၇ နှစ် ပြည့်တာနဲ့ အာဆင်နယ် အသင်း နှင့် ပရော်ဖက်ရှင်နယ် စာချုပ်ချုပ်ဆိုသွားမှာပါ ။ ၁၆ နှစ် အရွယ် ကွင်းလယ် ခံစစ် ကစားသမား မိုင်းလီဝစ်စကယ်လီ ကတော့ ယူ၁၈ နှင့် ယူ၂၁ တွေမှာ ပုံမှန် ပွဲထွက်ခွင့် ရနေတဲ့ ကစားသမား ဖြစ်ပါတယ် ။
ဝေါလ်တာစ် ကတော့ မနှစ်ကတည်းက အာဆင်နယ် အသင်းရဲ့ရာသီကြို ခြေစမ်းပွဲတွေမှာ ပါဝင် ကစားခွင့် ရခဲ့သူ ဖြစ်ပြီး အသင်းကြီးရဲ့ အရန်လူစာရင်းမှာလည်း မကြာခဏ ပါဝင်ခွင့် ရနေသူပါ ။ နည်းပြ အာတီတာ ဟာ ဒီ လူငယ်ကြယ်ပွင့် သုံးဦးကို ရာသီကြို ခြေစမ်းပွဲတွေမှာ မိနစ် အချို့ ကစားခွင့် ပေးသွားဖွယ်လည်း ရှိနေပါတယ် ။
အာဆင်နယ် အသင်းဟာ ဂျာမနီ ခြေစမ်းပွဲ ခရီးစဉ် ပြီးတာနဲ့ အမေရိက ကို ထွက်ခွာမှာ ဖြစ်ပြီး မေဂျာလိဂ် All-Stars ၊ မန်ယူနိုက်တက် ၊ ဘာစီလိုနာ တို့နဲ့ ခြေစမ်းမှာ ဖြစ်ပါတယ် ။ ပြီးရင်တော့ လန်ဒန်ကို ပြန်လာပြီး မိုနာကို အသင်း နဲ့ အမ်းမရိတ် ဖလား ပွဲ ကစားသွားပါမယ် ၊ အဲ့ဒီနောက်မှာတော့ မန်စီးတီး အသင်း နဲ့ ကွန်မြူနတီဒိုင်း ကစားသွားမှာ ဖြစ်ပါတယ် ။
