အင်္ဂလန်တောင်ပံကစားသမား ဆာကာက မိမိအနေဖြင့် အာဆင်နယ်အသင်းနှင့် နှစ်ရှည်စာချုပ်သစ် ချုပ်ဆိုနိုင်မည်ဟု ယုံကြည်ကြောင်း ပြောကြားခဲ့သည်။
အာဆင်နယ်အသင်းနှင့် ချုပ်ဆိုထားသည့် ဆာကာ၏ လက်ရှိစာချုပ်မှာ ၂၀၂၄ ခုနှစ်တွင် ကုန်ဆုံးမည်ဖြစ်ပြီး တစ်ပတ်လစာ ပေါင် (၇၀၀၀၀) ရရှိနေကြောင်း သိရသည်။
အာဆင်နယ်အသင်းသည် အသက် (၂၀) အရွယ် ဆာကာ၏ လက်ရှိလစာကို နှစ်ဆတိုးပေးကာ နှစ်ရှည်စာချုပ်သစ် ချုပ်ဆိုရန် ပြီးခဲ့သည့်ဇူလိုင်လကတည်းက ကြိုးပမ်းလျက်ရှိကြောင်း သိရှိရသည်။
လက်ရှိတွင် စာချုပ်သစ်အတွက် အာဆင်နယ်အသင်းတာဝန်ရှိသူများနှင့် ဆာကာ၏အေးဂျင့်တို့သည် အသေးစိတ်အချက်အလက်များကို ဆွေးနွေးနေဆဲဖြစ်ကြောင်း သိရသည်။
သို့သော် အာဆင်နယ်နည်းပြ အာတီတာက ဆာကာအနေဖြင့် အသင်းနှင့် စာချုပ်သစ်ချုပ်ဆိုမည်ဟု ယုံကြည်ကြောင်း ပြောကြားခဲ့သည်။
ထို့ကြောင့် အာတီတာ၏ အဆိုပါပြောဆိုမှုနှင့်ပတ်သက်၍ သတင်းထောက်တစ်ဦးက ဆာကာအား မေးမြန်းခဲ့ရာ ၎င်းက ”ဟုတ်ပါတယ်။ ကျွန်တော်လည်း နည်းပြလိုပဲ ယုံကြည်ချက်ရှိပါတယ်”ဟု ပြောကြားခဲ့သည်။
သတင်းထောက်က အသေးစိတ်ကို ထပ်မေးရာတွင် ဆာကာက ယင်းထက်ပိုပြောစရာမရှိကြောင်း ပြောကြားခဲ့သည်။
