အာဆင်နယ်နောက်တန်းကစားသမားသစ် ဘင်ဝှိုက်က မိမိအနေဖြင့် အသင်းကို အကောင်းဆုံးကူညီနိုင်မည်ဟု မျှော်လင့်ကြောင်း ပြောကြားခဲ့သည်။
အာဆင်နယ်အသင်းသည် ဘရိုက်တန်အသင်းမှ အင်္ဂလန်နောက်ခံလူ ဘင်ဝှိုက်အား ပေါင်သန်း (၅၀)ဖြင့် ခေါ်ယူကာ ၂၀၂၅ ခုနှစ်အထိ သက်တမ်းရှိ စာချုပ်တစ်ရပ်ချုပ်ဆိုခဲ့ကြောင်း သိရှိရသည်။
အသက် (၂၃)နှစ်အရွယ်ရှိ ဘင်ဝှိုက်သည် အာဆင်နယ်အသင်းတွင် ကျောနံပါတ် (၄) ဂျာစီကို ဝတ်ဆင်ကစားမည်ဖြစ်ပြီး အာဆင်နယ်အသင်းသို့ ထိပ်တန်းအဆင့်သို့ ပြန်ရောက်အောင် ကူညီနိုင်ရန်မျှော်လင့်ကြောင်း ပြောကြားခဲ့သည်။
ဘင်ဝှိုက်က “အာဆင်နယ်အသင်းကို ပြောင်းရွှေ့ဖြစ်မယ်လို့ ကျွန်တော် သိနေခဲ့တာ နည်းနည်းကြာပါပြီ။ အပြောင်းအရွှေ့ဟာ ကျွန်တော် ထင်တာထက် ပိုကြာခဲ့ပေမဲ့ အာဆင်နယ်အသင်းကို ပြောင်းရွှေ့ခွင့်ရလို့ ကျွန်တော် ဝမ်းသာပါတယ်။ ကျွန်တော့်အနေနဲ့ နွေရာသီမှာ နည်းပြ(အာတီတာ)နဲ့ စကားပြောခဲ့ပြီး နည်းပြ လိုချင်တဲ့ပုံစံအတိုင်း ကစားနိုင်မယ်လို့လည်း ထင်ပါတယ်။ အာဆင်နယ်အသင်းကို ထိပ်တန်းအဆင့် ပြန်ရောက်အောင် ကူညီနိုင်မယ်လို့ ကျွန်တော် ထင်ပါတယ်”ဟု ပြောကြားခဲ့သည်။
အာဆင်နယ်အသင်းနည်းပြ အာတီတာကလည်း ဘင်ဝှိုက်မှာ မိမိတို့ ခေါ်ယူရန် ပစ်မှတ်ထားခဲ့သည့် ကစားသမားဖြစ်ပြီး အပြောင်းအရွှေ့ ဖြစ်မြောက်ခဲ့ခြင်းအတွက် ဝမ်းသာကြောင်းနှင့် ဘင်ဝှိုက်အနေဖြင့် အသင်းတွင် ခြေစွမ်းပြနိုင်မည်ဟု ယုံကြည်ကြောင်း ပြောကြားခဲ့သည်။
ဘင်ဝှိုက်သည် ဆောက်သမ်တန်အကယ်ဒမီထွက် ကစားသမားတစ်ဦးဖြစ်ပြီး ပြီးခဲ့သည့်ရာသီက ဘရိုက်တန်အသင်းတွင် ပရီးမီးယားလိဂ် (၃၆)ပွဲအထိ ကစားခဲ့ကာ ခြေစွမ်းပြနိုင်ခဲ့ခြင်းကြောင်း ဥရောပထိပ်တန်းအသင်းများ၏ စိတ်ဝင်စားခြင်းကို ခံခဲ့ရသူဖြစ်သည်။
