မန်စီးတီးအသင်းနည်းပြ ဂွါဒီယိုလာက ကွင်းပြင်ပတွင် အာဆင်နယ်အသင်းကို လေးစားမှုမထားနိုင်ကြောင်း ပြောကြားခဲ့သည်။
ဝက်ဖို့ဒ်နှင့်ကစားသည့် ပွဲအတွက် ပြုလုပ်ခဲ့သော ပွဲကြိုသတင်းစာရှင်းလင်းပွဲတွင် ဂွါဒီယိုလာက ယင်းကဲ့သို့ ဖွင့်ဟခဲ့ခြင်း ဖြစ်သည်။
“ပြိုင်ဘက်အသင်းတွေဟာ ကျွန်တော့်ရဲ့လေးစားမှု၊ ချီးကျူးမှုနဲ့ အမြဲတမ်းထိုက်တန်ပါတယ်။ အာဆင်နယ်အသင်းကို ကွင်းထဲမှာ ကျွန်တော် လေးစားမှုအပြည့်ရှိပါတယ်။ ကွင်းပြင်ပမှာတော့ မရှိပါဘူး။ ဒါပေမဲ့ ကွင်းထဲမှာ အတော်လေးစားပါတယ်”ဟု ဂွါဒီယိုလာက ပြောကြားသည်။
ဂွါဒီယိုလာ၏ပြောစကားကြောင့် မန်စီးတီးအသင်းနှင့် အာဆင်နယ် ဘုတ်အဖွဲ့ဝင်များအကြား အဆင်မပြေမှုများ ရှိနေသည်မှာ ပိုမိုထင်ရှားစေသည်ဟုလည်း Daily Mail သတင်းစာက ဖော်ပြခဲ့သည်။
မန်စီးတီးအသင်းသည် ဥရောပပြိုင်ပွဲဝင်ခွင့် ပိတ်ပင်ခံရသည့်ပြစ်ဒဏ်အတွက် နိုင်ငံတကာအားကစားခုံရုံး(CAS)သို့ အယူခံဝင်ရာတွင် အောင်မြင်မှုမရစေရန် ကြိုးပမ်းခဲ့သည့် အသင်း(၈)သင်းတွင် အာဆင်နယ်အသင်းမှ ရှေ့ဆုံးတန်းမှ ဦးဆောင်ပါဝင်ခဲ့ခြင်းကြောင့် ယင်းအသင်း နှစ်သင်းအကြား မကျေလည်မှုများ ရှိနေခြင်း ဖြစ်သည်။
ထို့ပြင် ဂွါဒီယိုလာက ဇူလိုင် (၁၈) ရက်တွင်ကစားခဲ့သော FA ဖလား ဆီမီးဖိုင်နယ်ပွဲစဉ်တွင် မန်စီးတီးအသင်းကို အနိုင်ယူခဲ့သည့် အာဆင်နယ်အသင်းအား ချီးကျူးမှုများ ပြုလုပ်ခဲ့ပြီး ယင်းပွဲပထမပိုင်းတွင် ဒုတိယပိုင်းကဲ့သို့ မကစားနိုင်သည်မှာ နောင်တရစရာ ဖြစ်ကြောင်းနှင့် ပွဲချိန် မိနစ် (၉၀) ပြည့် ဒုတိယပိုင်းကစားပုံမျိုး ကစားရန်လိုအပ်သည်ဟု ဝန်ခံခဲ့သည်။
