အာဆင်နယ်အသင်း၏ တိုက်စစ်မှူးဟောင်း သီယာရီအွန်နရီသည် စီးရီးဘီကလပ် ကိုမိုအသင်း၏ ရှယ်ယာရှင်တစ်ဦးဖြစ်လာကြောင်း သိရသည်။
ကိုမိုအသင်းသည် ၂၀၀၂-၀၃ ရာသီက စီးရီးအေပြိုင်ပွဲတွင် ယှဉ်ပြိုင်ကစားခဲ့ဖူးသည့်အသင်းဖြစ်သော်လည်း နောက်ပိုင်းတွင် စီးရီးဒီအထိ ဆင်းသက်ယှဉ်ပြိုင်ခဲ့ရသည့်အသင်းဖြစ်ပြီး ၂၀၂၀-၂၁ ရာသီတွင်မှ စီးရီးဘီသို့ ပြန်လည်ရောက်ရှိလာခြင်းဖြစ်သည်။
ယင်းအသင်းကို ချယ်လ်ဆီးအသင်းနှင့် အင်္ဂလန်လက်ရွေးစင် ကွင်းလယ်ကစားသမားဟောင်း ဒင်းနစ်ဝိုက်စ်က ဥက္ကဋ္ဌအဖြစ် တာဝန်ယူနေပြီး အာဆင်နယ်ကစားသမားဟောင်း ဖာဘရီဂတ်စ်လည်း ပါဝင်ကစားနေသည်။
ထို့ပြင် ဖာဘရီဂတ်စ်သည် ကိုမိုအသင်း၏ ရှယ်ယာရှင်တစ်ဦးအဖြစ်လည်း ရပ်တည်နေသောကြောင့် အွန်နရီက ယင်းအသင်းတွင် ရင်းနှီးမြှုပ်နှံမှု ပြုလုပ်ရန် ဆုံးဖြတ်ခဲ့ခြင်းဖြစ်ကြောင်း သိရသည်။
အွန်နရီက ”ဒီအသင်းရဲ့ စီမံကိန်းတွေထဲမှာ ပါဝင်ခွင့်ရဖို့ ကျွန်တော် အကြာကြီးစောင့်နေခဲ့ရတာပါ။ ဘာစီလိုနာမှာ အသင်းဖော်တွေဖြစ်ခဲ့တဲ့ ဖာဘရီဂတ်စ်၊ ဇမ်ဘရော့တာတို့နဲ့လည်း စကားပြောဖြစ်ခဲ့ပါတယ်။ ကိုမိုအသင်းမှာ လှပတဲ့ သမိုင်းကြောင်းရှိပြီး ဘောလုံးလောကမှာ မကြာခင် လူသိပိုများလာလိမ့်မယ်လို့လည်း မျှော်လင့်ပါတယ်။ ဒီအသင်းက ကျွန်တော့်ရဲ့ ဘဝစာမျက်နှာသစ်ပါပဲ”ဟု ပြောကြားခဲ့သည်။
ကိုမိုအသင်း၏ ဥက္ကဋ္ဌ ဒင်းနစ်ဝိုက်စ်ကလည်း အွန်နရီသည် ကိုမိုအသင်း၏ ရည်မှန်းချက်များကို သဘောကျသည့်အတွက် ရင်းနှီးမြှုပ်နှံရန် ဆုံးဖြတ်ခဲ့ခြင်းဖြစ်ကြောင်း ပြောကြားခဲ့သည်။
