မနေ့ညက ကစားသည့်ပွဲတွင် မန်စီးတီးသည် အာဆင်နယ်ကို အဝေးကွင်းတွင် ၁-၃ ဖြင့်အနိုင်ရရှိပြီး ဇယားထိပ်ဆုံးတွင် ရပ်တည်နေနိုင်ပြီဖြစ်သည်။ ဂွာဒီယိုလာက မန်စီးတီးအသင်း၏ ပထမပိုင်း အပြီးတွင် ကစားသည့်နည်းစနစ်ကို အပြောင်းအလဲလုပ်လိုက်နိုင်ခြင်းကြောင့် အာဆင်နယ်ကို အနိုင်ရခြင်းဖြစ်ကြောင်း ထုတ်ဖော်ပြောဆိုလိုက်သည်။
ပထမပိုင်း ၂၄ မိနစ်တွင် ဒီဘရန်းနားက မန်စီးတီးအတွက်အဖွင့်ဂိုးကို သွင်းပေးနိုင်ခဲ့သည်။ ပွဲချိန် ၄၂ မိနစ်တွင် ဆာကာက ပင်နယ်တီမှ တဆင့် ချေပဂိုးသွင်းလိုက်သောကြောင့် မန်စီးတီးနှင့် အာဆင်နယ်တို့သည် ပထမပိုင်းအပြီးတွင် တစ်ဂိုးစီသရေကျနေသည်။ ပွဲချိန် ၇၂ မိနစ်တွင် ဂွန်ဒိုဂန်၏ ဖန်တီးမှုမှတဆင့် ဂရီးလစ်ရှ်က တစ်ဂိုးနှင့် ပွဲချိန် ၈၂ မိနစ်တွင် ဒီဘရန်းနာ၏ ဖန်တီးမှုမှတဆင့် ဟာလန်းက တစ်ဂိုးသွင်းနိုင်ခြင်းကြောင့် မန်စီးတီးက ပွဲအပြီးတွင် ၁-၃ ဖြင့် အနိုင်ရခဲ့ခြင်းဖြစ်သည်။
ဂွာဒီယိုလာသည် အာတီတာ ကိုင်တွယ်သောအသင်းနှင့် နောက်ဆုံးကစားသော ၉ ပွဲတွင် ၈ ပွဲအနိုင်ရခြင်း အဖြစ်လည်း မှတ်တမ်းဝင်သွားသည်။ ဂွာဒီယိုလာ၏ နည်းပြအဖွဲ့ဝင်တစ်ဦးအဖြစ် ၂၀၁၆-၁၉ အထိ ဆောင်ရွက်ခဲ့သူတစ်ဦးက မန်စီးတီး၏ ပထမပိုင်းကစားနေသည့် နည်းစနစ်ကို ပြောင်းလဲရန် ထောက်ပြခဲ့ပြီး ထိုသို့အပြောင်းအလဲကိုလုပ်ခဲ့ပြီးနောက် မန်စီးတီးသည် ဒုတိယပိုင်းတွင် အနိုင်ဂိုးနှစ်ဂိုးကို ရရှိကာ အနိုင်ရခဲ့ခြင်းဖြစ်ကြောင်း ဂွာဒီယိုလာက ပြောဆိုလိုက်သည်။
“ပထမပိုင်းမှာ မန်စီးတီးကစားတာက အာဆင်နယ်ကို သာတယ်လို့ ပြောလို့မရပါဘူး။ ဒုတိယပိုင်း မှာတော့ မန်စီးတီးခြေစွမ်းက အပြန်သာခဲ့ပါတယ်။ ပထမပိုင်းမှာ အာဆင်နယ်က ခြေစွမ်းကောင်းလွန်းတော့ ကျွန်တော်တို့က ခုခံကစားနေရတာနဲ့ အချိန်ကုန်နေတယ်။ ပထမပိုင်းမှာ ကျွန်တော်ချမှတ်ခဲ့တဲ့ နည်းစနစ်ကလည်း အဆင်မပြေဖြစ်ခဲ့ပါတယ်။ ဒုတိယပိုင်းမှာ ကျွန်တော်တို့ ကစားကွက်ပြောင်းလိုက်တယ်။ အာဆင်နယ်က အိုဒီဂတ်နားမှာ တက်တက်ကြွကြွနဲ့ ဖိအားပေးပြီး ကစားခဲ့ပါတယ်။ ဟာလန်းကလည်း သူ့ရဲ့ခွန်အားကို သုံးပြီးဘောလုံးကို ထိန်းသလို ကျန်အသင်းသား တွေကလည်း ဘောလုံးပိုင်ဆိုင်မှုကို ဦးစားပေးကစားသွားတယ်။ ပထမပိုင်းမှာ ခံလိုက်ရတာတွေ ရှိပေမယ့် ဒုတိယပိုင်းမှာကျတော့ မန်စီးတီးက တစ်ယောက်ချင်းယှဉ်ရင်ကို အာဆင်နယ်ထက်သာသွား ပါတယ်။ ဒုတိယပိုင်းမှာ မန်စီးတီးက အများကြီးသာသွားပါတယ်”ဟု ဂွာဒီယိုလာက ပြောဆိုလိုက်သည်။
ဂွာဒီယိုလာက နည်းစနစ်ပြောင်းလိုက်ခြင်းကြောင့် ဒုတိယပိုင်းတွင် ပိုကောင်းသွားသည်ဟု ခံစားရကြောင်း လည်း ဟာလန်းက ပြောဆိုခဲ့သည်။ “ ပက်(ဂွာဒီယိုလာ)က ပထမပိုင်းအပြီးမှာ အပြောင်းအလဲအနည်းငယ်လုပ်လိုက်ပါတယ်။ အဆုံးသတ်မှာတော့ မန်စီးတီးမှာ ကစားသမားကောင်း တွေရှိပြီးသူတို့က အကောင်းဆုံးစွမ်းရည်ကို ထုတ်ပြခဲ့တယ်လို့ပဲဆိုရမှာဖြစ်ပါတယ်။ မန်စီးတီးက အရင်တုန်းက ကစားကွက်ကို ပြန်ကစားခဲ့တယ်လို့လည်း ဆိုနိုင်ပါတယ်”ဟု ဟာလန်းက ပြောဆိုလိုက်သည်။ ဂွာဒီယိုလာက အာဆင်နယ်သည် အနိုင်ပွဲများကို ပြန်လည်ရှာဖွေတွေ့ရှိဦးမည် ဖြစ်ကြောင်း ပရီးမီးယားလိဂ်တွက် ကစားရန် ပွဲပေါင်းများစွာကျန်နေသေးကြောင်း ချန်ပီယံပြေးလမ်းသည် များစွာအကြိတ်အနယ် ယှဉ်ပြိုင်ရဦးမည်ဖြစ်ကြောင်းလည်း ပြောဆိုလိုက်သည်။
